नाशिक (इंडिया दर्पण वृत्तसेवा)– भाजीपाला खरेदी करून घराकडे परतणा-या महिलेच्या गळयातील शॉर्ट पोत भामट्यानी ओरबाडून नेल्याची घटना मखमलाबाद रोडवर घडली. या घटनेत भामट्यांनी सुमारे ३० हजार रूपये किमतीची पोत हिसकावून नेली असून याप्रकरणी पंचवटी पोलीस ठाण्यात जबरी चोरीचा गुन्हा दाखल करण्यात आला आहे.
रंजना कैलास संगमनेरे (५३ रा. जानता राजा कॉलनी,मखमलाबादरोड) यांनी फिर्याद दिली आहे. संगमनेरे या गेल्या मंगळवारी (दि.१२) सायंकाळच्या सुमारास भाजीपाला खरेदी करण्यासाठी मखमलाबादरोड भागात गेल्या होत्या. भाजीपाला खरेदी करून त्या रेणूका हाईटस या इमारतीसमोरून आपल्या घराकडे पायी जात असतांना ही घटना घडली.
पाठीमागून पळत आलेल्या भामट्याने त्यांच्या गळयातील सुमारे ३० हजाराची शॉट पोत हिसकावून पुढे उभ्या असलेल्या दुचाकीवर बसून ड्रिम कॅसल सिग्नलच्या दिशेने पोबारा केला. अधिक तपास उपनिरीक्षक सोनवणे करीत आहेत.
…………
बसमध्ये चढतांना गर्दीची संधी साधत ठाणे येथील महिलेची पर्स चोरट्यांनी केली लंपास
नाशिक (इंडिया दर्पण वृत्तसेवा)- बसमध्ये चढतांना गर्दीची संधी साधत चोरट्यांचा ठाणे येथील महिलेच्या बॅगेतील पर्स चोरून नेली. ही घटना महामार्ग बसस्थानकात घडली. पर्समध्ये तीन हजाराच्या रोकडसह सुमारे दीड लाख रूपये किमतीचे अलंकार होते. याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार सत्यभामा अशोक काकड (रा. कळवा प.ठाणे)यांनी याबाबत फिर्याद दिली आहे. काकड या शहरात आल्या होत्या. रविवारी (दि.२४) दुपारच्या सुमारास त्या परतीच्या प्रवासासाठी महामार्ग बसस्थानकात गेल्या असता ही घटना घडली. ठाणे बोरिवली या बसमध्ये चढत असतांना गर्दीची संधी साधत अज्ञात भामट्याने त्यांच्या पिशवीतील पर्स चोरून नेली. या पर्स मध्ये तीन हजाराची रोकड, सोन्याची पट्टी पोत,व पायातले पैंजन असे सुमारे १ लाख ५८ हजार रूपये किमतीचे अलंकार होते. काकड या बसमध्ये बसल्या असता ही घटना निदर्शनास आली. अधिक तपास हवालदार बहिरम करीत आहेत.
