नाशिक (इंडिया दर्पण वृत्तसेवा)- इमारतीच्या चौथ्या मजल्यावरून पडल्याने २३ वर्षीय विवाहीतेचा मृत्यू झाला. ही घटना पेठरोडवरील शरद पिंगळेनगर भागात घडली असून याप्रकरणी म्हसरूळ पोलीस ठाण्यात मृत्यूची नोंद करण्यात आली आहे.
पोलीसांनी दिलेल्या माहितीनुसार प्रिया किसन वर्मा (रा.श्रीरंग सोसा.शरद पिंगळेनगर) असे मृत महिलेचे नाव आहे. वर्मा गुरूवारी (दि.२१) सकाळच्या सुमारास सोसायटीच्या चौथ्या मजल्यावरील आपल्या राहत्या सदनिकेच्या गच्चीमध्ये काम करीत असतांना ही घटना घडली. अचानक तोल गेल्याने त्या चौथ्यामजल्यावरून जमिनीवर कोसळल्या होत्या.
या घटनेत त्यांना गंभीर दुखापत झाल्याने कुटूंबियांनी प्रथम नामको हॉस्पिटल येथे प्रथमोपचार करून अधिक उपचारार्थ आडगाव येथील मेडिकल कॉलेज येथे दाखल केले असता उपचार सुरू असतांना वैद्यकीय सुत्रांनी त्यांना मृत घोषीत केले. अधिक तपास हवालदार फुलपगारे करीत आहेत.
