नाशिक (इंडिया दर्पण वृत्तसेवा)- शहरात वाहनचोरीची मालिका सुरू असून वेगवेगळया भागात पार्क केलेल्या तीन मोटारसायकली चोरट्यांनी पळवून नेल्या. याप्रकरणी पंचवटी, मुंबईनाका व नाशिकरोड पोलीस ठाण्यात गुन्हे दाखल करण्यात आले आहेत.
डिजीपीनगर भागातील तेजस संतोष खैरणार (रा.वृदावननगर) हा युवक शुक्रवारी (दि.१५) रात्री गोदाघाटावर गेला होता. रामकुंड परिसरात पार्क केलेली त्याची प्लॅटीना एमएच ४१ बीएफ ८३८० चोरट्यांनी चोरून नेली. याबाबत पंचवटी पोलीस ठाण्यात गुन्हा दाखल करण्यात आला असून अधिक तपास हवालदार काळे करीत आहेत.
दुसरी घटना अशोकामार्ग भागात घडली. अशोक बाळासाहेब पवार (रा.सिंधूमुनी रेसि.गणेश बाबा मंदिरासमोर,अशोकामार्ग) यांची बुलेट एमएच ०५ डीजे १८२८ रविवारी (दि.१७) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी ती पळवून नेली. याबाबत मुंबईनाका पोलीस ठाण्यात गुन्हा दाखल करण्यात आला असून अधिक तपास हवालदार शिंदे करीत आहेत.
तिसरी घटना जेलरोड भागात घडली. मोहित मोहन तेलानी (रा.देवीदर्शन अपा.ढिकलेनगर कॅनोलरोड ) यांनी याबाबत फिर्याद दिली आहे. तेलानी यांची स्प्लेंडर एमएच १५ एचव्ही ३७९५ गेल्या गुरूवारी (दि.७) रात्री त्यांच्या सोसायटीच्या आवारात लावलेली असतांना ती चोरट्यांनी चोरून नेली. याबाबत नाशिकरोड पोलीस ठाण्यात गुन्हा दाखल करण्यात आला असून अधिक तपास हवालदार भोळे करीत आहेत.
