नाशिक (इंडिया दर्पण वृत्तसेवा)– रस्त्याच्या कडेला पार्क केलेल्या दोन टेम्पोमधून चोरट्यांनी स्टेपन्या चोरून नेल्याचा प्रकार सिडकोतील दौलतनगर भागात घडला. या घटनेत सुमारे २० हजार रूपये किमतीच्या दोन स्टेपन्या भामट्यांनी पळविल्या असून याप्रकरणी अंबड पोलीस ठाण्यात चोरीचा गुन्हा दाखल करण्यात आला आहे.
कलीम रहिम सय्यद (रा.फ्लोराटाऊन अपा.अंबड) यांनी फिर्याद दिली आहे. सय्यद व लता वरपे यांच्या मालकीचे अशोक लेलण्ड कंपनीचे बडा दोस्त टेम्पो एमएच १५ जे डब्ल्यू ००२३ व एमएच १५ जेसी ९४०९ गेल्या २२ ऑक्टोबर रोजी रात्री दौलतनगर येथील शिव अमृत संकुल समोरील रस्त्यावर मोकळया जागेत पार्क केलेले असतांना ही घटना घडली. अज्ञात चोरट्यांनी दोन्ही वाहनातील सुमारे २० हजार रूपये किमतीच्या दोन स्टेपन्या चोरून नेल्या. अधिक तपास हवालदार आवारे करीत आहेत.
