नाशिक (इंडिया दर्पण वृत्तसेवा)- शहरात वाहनचोरीचे सत्र सुरूच असून मखमलाबाद शिवारात घडलेल्या दोन घटनांमध्ये चोरट्यांनी दोन मोटारसायकली पळवून नेल्या. याप्रकरणी पंचवटी व म्हसरूळ पोलीस ठाण्यात गुन्हे दाखल करण्यात आले आहेत.
मखमलाबाद रोड भागातील ललीत छगन सोनवणे (रा.ओम बंगला,विठ्ठल रूख्मिनी मगल कार्यालया शेजारी) यांनी याबाबत फिर्याद दिली आहे. सोनवणे यांची अ‍ॅक्सेस दुचाकी एमएच १५ एचडब्ल्यू ८६६० गुरूवारी (दि.७) रात्री त्यांच्या बंगल्याच्या आवारात पार्क केलेली असतांना ती चोरट्यांनी चोरून नेली. याबाबत पंचवटी पोलीस ठाण्यात गुन्हा दाखल करण्यात आला असून, अधिक तपास हवालदार वाडेकर करीत आहेत.
दुसरी घटना याच भागातील माळी मंगल कार्यालय परिसरात घडली. याबाबत पुष्पक अशोकराव भामरे (रा.स्वस्तिक रेसि.) यानी फिर्याद दिली आहे. भामरे यांची दुचाकी गेल्या ३ ते ६ नोव्हेंबर दरम्यान त्यांच्या सोसायटीच्या पार्किंगमध्ये लावलेली असतांना चोरट्यांनी ती पळवून नेली. याबाबत म्हसरूळ पोलीस ठाण्यात गुन्हयाची नोंद करण्यात आली असून अधिक तपास हवालदार गवारे करीत आहेत.
