नाशिक (इंडिया दर्पण वृत्तसेवा) – भाजीपाला खरेदी करून घराकडे परतणा-या महिलेच्या गळयातील सोन्याचे अलंकार दुचाकीस्वार भामट्यांनी ओरबाडून नेले. ही घटना रवी शंकर मार्गावरील अर्णेश्वर महादेव मंदिर परिसरात घडली. याप्रकरणी उपनगर पोलीस ठाण्यात जबरीचोरीचा गुन्हा दाखल करण्यात आला आहे.
राधा रमेश जोंधळे (रा.नेहा पार्क जवळ,टागोरनगर) यांनी याबाबत फिर्याद दिली आहे. जोंधळे या गेल्या शनिवारी (दि.२) सायंकाळच्या सुमारास भाजीपाला खरेदी करण्यासाठी परिसरातील रविशंकर मार्ग भागात गेल्या होत्या. भाजीपाला खरेदी करून त्या घराकडे परतत असतांना ही घटना घडली. अर्णेश्वर महादेव मंदिराजवळून त्या पायी जात असतांना अ‍ॅक्टीव्हावर आलेल्या भामट्यांनी त्यांच्या गळयातील मंगळसूत्र, बोरमाळ व शॉट पोत असे सुमारे ९० हजार रूपये किमतीचे दागिणे हिसकावून नेले. अधिक तपास पोलीस नाईक भामरे करीत आहेत.
रोकडसह दोन मोबाईल चोरून नेले
नाशिक (इंडिया दर्पण वृत्तसेवा) – उघड्या घरात शिरून चोरट्यांनी रोकडसह दोन मोबाईल चोरून नेल्याची घटनाजुना कुंभारवाडा भागात घडली. या घटनेत सुमारे २० हजाराच्या ऐवजावर चोरट्यांनी डल्ला मारला असून याप्रकरणी भद्रकाली पोलीस ठाण्यात गुन्हा दाखल करण्यात आला आहे.
प्रमोद त्र्यंबक शिंदे (रा.भंडारी बाबा मंदिराजवळ,काझीगढी) यांनी फिर्याद दिली आहे. शिंदे कुटुंबिय सोमवारी (दि.४) रात्री उकाड्यामुळे नेहमी प्रमाणे दरवाजा उघडा ठेवून झोपी गेले असता ही घटना घडली. मध्यरात्री अज्ञात चोरट्याने उघड्या दरवाजातून घरात प्रवेश केला. घरात शिरलेल्या भामट्याने कपाटातील पाच हजाराची रोकड तसेच वरिल मजल्यावर शिलाई मशिनवर ठेवलेले दोन मोबाईल असा सुमारे २० हजाराचा ऐवज चोरून नेला. अधिक तपास हवालदार बोंबले करीत आहेत.
बसप्रवासात महिलेच्या पर्समधील १६ हजाराची रोकड चोरट्यांनी केली लंपास
नाशिक (इंडिया दर्पण वृत्तसेवा) – बसप्रवासात महिलेच्या पर्स मधील रोकडवर चोरट्यांनी डल्ला मारल्याचा प्रकार द्वारका ते सिन्नर फाटा दरम्यान घडला. या घटनेत भामट्यांनी १६ हजाराची रोकड लांबविली असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
मिनाबाई अशोक सोनवणे (रा.खापरेमळा,सिन्नरफाटा) यांनी याबाबत फिर्याद दिली आहे. सोनवणे या रविवारी (दि.३) कामानिमित्त शहरात आल्या होत्या. सायंकाळच्या सुमारास त्या सिटीलिंक बसमधून परतीचा प्रवास करीत असतांना ही घटना घडली. द्वारका सर्कल ते सिन्नर फाटा दरम्यानच्या प्रवासात अज्ञात चोरट्याने बसमध्ये असलेल्या गर्दीची संधी साधत सोनवणे यांच्या पसर्मधील १६ हजाराच्या रोकडवर डल्ला मारला. अधिक तपास हवालदार देवरे करीत आहेत.
