नाशिक (इंडिया दर्पण वृत्तसेवा) – बस थांब्यावर सोडण्याचे आमिष दाखवून दुचाकीस्वारांनी दोघा परप्रांतीय हॉटेल कामगारांना लुटल्याची घटना द्वारका भागात घडली. या घटनेत कामगारांना मारहाण करीत भामट्यांनी रोकडसह मोबाईल व कपडे असा सुमारे साडे बारा हजाराचा ऐवज पळविला असून याप्रकरणी भद्रकाली पोलीस ठाण्यात जबरीलुटीचा गुन्हा दाखल करण्यात आला आहे.
नेपाळ राज्यातील धिरज दलबहादुर गिरी (२३ रा.मनमाड ता.नांदगाव) या हॉटेल कामगाराने फिर्याद दिली आहे. गिरी मनमाड येथील शिरूबाबा ऑल ईन वन व्हेज अ‍ॅण्ड नॉनव्हेज रेष्टॉरंट या हॉटेलवरील कामगार असून तो सोमवारी (दि.४) रात्री रवी मगर नामक मित्रासमवेत शहरात आला होता. रात्री उशीर झाल्याने दोघे मित्र मध्यरात्री मनमाड येथे जाण्यासाठी द्वारका परिसरात जात असतांना ही घटना घडली. रस्त्याने दोघे मित्र पायी जात असतांना दोन दुचाकीवर डबलसिटी आलेल्या भामट्यांनी त्यांना गाठले. दोघा मित्रांची विचारपूस करीत भामट्यांनी त्यांना द्वारका येथील बसस्टॉपवर सोडून देण्याचे आमिष दाखविल्याने ही घटना घडली.
दोन दुचाकीवर ट्रिपलसिट बसवून निघालेल्या भामट्यांनी दोघा मित्रांना ट्रॅक्टर हाऊस परिसरात घेवून जात ही लुटमार केली. दोघा मित्रांना लाथाबुक्यांनी बेदम मारहाण करीत भामट्यांनी त्यांची नवीन कपडे खरेदी केलेली बॅग, खिशातील अडिच हजार रूपयांची रोकड व मोबाईल असा सुमारे १२ हजार ५०० रूपये किमतीचा ऐवज बळजबरीने काढून घेत पोबारा केला. अधिक तपास उपनिरीक्षक रणदिवे करीत आहेत.
