नाशिक (इंडिया दर्पण वृत्तसेवा)- जेलरोड भागात झालेल्या घरफोडीत चोरट्यांनी सुमारे पावणे दोन लाखाच्या ऐवजावर डल्ला मारला. त्यात २० हजाराच्या रोकडसह सोन्याचांदीच्या दागिण्यांचा समावेश आहे. याबाबत उपनगर पोलीस ठाण्यात गुन्हा दाखल करण्यात आला आहे.
ज्योती अक्षय बुराडे (रा.अनमोल पार्क,विठ्ठल मंगल कार्यालयामागे लोखंडेमळा) यांनी याबाबत फिर्याद दिली आहे. बुराडे कुटुंबिय बुधवारी (दि.३०) बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून बेडरूममधील कपाटात ठेवलेली २० हजाराची रोकड व सोन्याचांदीचे दागिणे आणि मनगटी घड्याळ असा सुमारे १ लाख ७२ हजाराचा ऐवज चोरून नेला. अधिक तपास हवालदार पवार करीत आहेत.
तडिपाराच्या पोलीसांनी मुसक्या आवळल्या
नाशिक (इंडिया दर्पण वृत्तसेवा)- हद्दपारीची कारवाई करूनही शहरात वावर ठेवणा-या तडिपाराच्या पोलीसांनी मुसक्या आवळल्या. ही कारवाई विनयनगर भागात करण्यात आली. याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
सरोज शेरू शेख (२४ रा. मदिना मज्जीद जवळ, बजरंगवाडी) असे गुन्हा दाखल करण्यात आलेल्या तडिपाराचे नाव आहे. सरोज शेख याच्या वाढत्या गुन्हेगारी कारवायांच्या पार्श्वभूमिवर शहर पोलीसांनी त्याच्या विरूध्द हद्दपारीची कारवाई केली आहे. शहर आणि जिह्यातून त्यास दोन वर्षांसाठी हद्दपार केलेले असतांनाही त्याचा वावर शहरातच असल्याची माहिती पोलीसांना मिळाली होती. पोलीस त्याच्या मागावर असतांनाच गुरूवारी (दि.३१) तो विनयनगर येथील कालिका पेट्रोलपंप परिसरात मिळून आला. याबाबत अंमलदार अमोल बागलाणे यांनी फिर्याद दिली असून अधिक तपास हवालदार टेमगर करीत आहेत.
