नाशिक (इंडिया दर्पण वृत्तसेवा)- कटलरी सामानाचे नुकसान केल्याबाबत जाब विचारणा-या महिलेचा एकाने विनयभंग केल्याची घटना पाथर्डी शिवारातील मुरलीधरनगर भागात घडली. तुझ्या मुली कॉलेजला कश्या जातात ते मी बघतो अशी धमकी दिल्याने पीडितेने पोलीसात धाव घेतली असून, याप्रकरणी इंदिरानगर पोलीस ठाण्यात गुन्हा दाखल करण्यात आला आहे.
संतोष जाधव असे संशयिताचे नाव आहे. पीडिता व संशयित मुरलीधर नगर येथील भाजीमार्केट परिसरात वेगवेगळे व्यवसाय करतात. गुरूवारी (दि.३१) सायंकाळच्या सुमारास महिला रस्त्यावर आपले कटलरी मालाचे दुकान थाटून व्यवसाय सांभाळत असतांना एमएच १५ सीडी ८२१३ या मारूती व्हॅन मधून आलेल्या संशयिताने मागील भांडणाचा राग मनात धरून चारचाकीने सामानाची नासधुस केली.
पीडिता व तिच्या मुलीने याबाबत जाब विचारला असता संशयिताने मायलेकींना शिवीगाळ करीत महिलेचा विनयभंग केला. यावेळी त्याने मुली कश्या कॉलेजला जातात ते बघतोच अशी धमकी दिल्याचे तक्रारीत नमुद करण्यात आले आहे. अधिक तपास उपनिरीक्षक बारेला करीत आहेत.
