नाशिक (इंडिया दर्पण वृत्तसेवा) – पेठरोडवरील साई हॉस्पिटल भागात गोवंश तस्करीच्या संशयातून म्हशींची वाहतूक करणा-या दोन वाहनांना रोखून टोळक्याने तिघांना बेदम मारहाण केल्याची घटना घडली. या घटनेत लाकडी दांडक्याने मारहाण करण्यात आल्याने तिघे जखमी झाले असून टोळक्याने या घटनेत वाहनांची तोडफोड करीत दीड लाखाची रोकड पळविल्याचा आरोप करण्यात आला असून याप्रकरणी म्हसरूळ पोलीस ठाण्यात आठ जणांवर गुन्हा दाखल करण्यात आला आहे.
पोलीसांनी दिलेल्या माहितीनुसार वाजीद इस्माईल कुरेशी (वय ३५, रा. कठडा मशीद जवळ, जुने नाशिक) यांनी फिर्याद दिली आहे. कुरेशी यांनी पेठ तालुक्यातील ननाशी येथून म्हशी खरेदी केल्या होत्या. पीकअप एमएच १५ बीजे ७८६१ व अशोक लेलँडच्या एमएच ०२ सीई ७६२२ या वाहनातून सोमवारी (दि.९) रात्री जनावरे नाशिकच्या दिशेने घेवून येत असतांना हा हल्ला झाला.
पेठ रोडवरील साईराम हॉस्पिटलसमोर टळक्याने जनावरे भरलेली वाहने अडवून फहाद चौधरी (रा. बागवानपुरा), हमीद शेख (रा. वडाळा), वाजीद शेख (रा. नाईकवाडीपुरा) या तिघांना खाली ओढून जबर मारहाण केली. या घटनेत टोळक्याने वाहनातील दीड लाखाच्या रकमेवर डल्ला मारत तोडफोड केल्याचा आरोप करण्यात आला असून अधिक तपास उपनिरीक्षक मद्रुपकर करीत आहेत.
……..
