नाशिक (इंडिया दर्पण वृत्तसेवा)- शहरात घरफोडीची मालिका सुरू असून नुकत्याच दोन ठिकाणी झालेल्या घरफोडींमध्ये चोरट्यांनी सुमारे दीड लाखाच्या ऐवजावर डल्ला मारला. त्यात एका भरदिवसा झालेल्या घरफोडीचा समावेश असून याप्रकरणी अंबड व उपनगर पोलीस ठाण्यात नोंदी करण्यात आल्या आहेत.
पोलीसांनी दिलेल्या माहितीनुसार पहिली घटना सातपूर अंबड लिंक रोड भागात घडली. याबाबत सुनिता अनिल साठे (रा.गणेश रो हाऊस गोल्डन पार्क बिल्डींग पाठीमागे पाटील पार्क) यांनी याबाबत फिर्याद दिली आहे. साठे कुटुंबिय गुरूवारी (दि.२४) सकाळच्या सुमारास अल्पशा कामानिमित्त घराबाहेर पडले असता ही घटना घडली. अज्ञात चोरट्यांनी भरदिवसा त्यांच्या बंद घराचे कुलूप तोडून कपाटात ठेवलेली रोकड व सोन्याचांदीचे दागिणे असा सुमारे ५५ हजार ५०० रूपयांचा ऐवज चोरून नेला. याबाबत अंबड पोलीस ठाण्यात नोंद करण्यात आली असून अधिक तपास हवालदार झोले करीत आहेत.
दुसरी घटना जेलरोड परिसरातील लोखंडे मळा भागात घडली. याबाबत सुधीर शंकरराव गटलेवार (रा.आस्था बंगला,पुष्पकनगर) यांनी फिर्याद दिली आहे. गटलेवार कुटुंबिय दि.२२ ते २५ आॅक्टोबर दरम्यान बाहेरगावी गेले असता ही घटना घडली. अज्ञात चोरट्यांनी त्यांच्या बंद बंगल्याच्या खिडकीचे गज कापून ही चोरी केली. घरात शिरलेल्या चोरट्यानी बेडरूममधील कपाटातून ५५ हजाराची रोकड तसेच अ‍ॅपल कंपनीचा आयपॅड, घड्याळ व देवघरातील पुजेचे साहित्य व मुर्त्या असा सुमारे १ लाख ६ हजार ५०० रूपये किमतीचा ऐवज चोरून नेला. याबाबत उपनगर पोलीस ठाण्यात घरफोडीचा गुन्हा दाखल करण्यात आला असून अधिक तपास उपनिरीक्षक गोसावी करीत आहेत.
