नाशिक (इंडिया दर्पण वृत्तसेवा) – दूध घेवून घराकडे परतणा-या अल्पवयीन मुलीची वाट अडवित एकाने भररस्त्यात विनयभंग केल्याची घटना पेठरोड भागात घडली. प्रेमसंबधास नकार दिल्याने हा प्रकार घडला असून याप्रकरणी पंचवटी पोलीस ठाण्यात गुन्हा दाखल करण्यात आला आहे.
नरेश शंकर बाबर (रा.फुलेनगर) असे गुन्हा दाखल करण्यात आलेल्या युवकाचे नाव आहे. अल्पवयीन पिडीता गुरूवारी (दि.२४) सायंकाळच्या सुमारास पेठरोडवरील पाटा जवळ असलेल्या गण्याच्या गोठ्यात दुध खरेदी करण्यासाठी गेली होती. दुध घेवून ती आपल्या घराकडे पायी जात असतांना फुलेनगर येथील नवजीनव हॉस्पिटल भागात संशयिताने तिला गाठून हे कृत्य केले.
भररस्त्यात वाट अडवित संशयिताने तु मला आवडतेस माझ्याबरोबर लग्न कर असा तगादा लावला. यावेळी मुलीने लग्नास नकार देत आपल्या आजीकडे तुझी तक्रार करेल अशी धमकी दिल्याने संतप्त युवकाने जीवे मारण्याची धमकी देत तिच्याशी अंगलट करीत विनयभंग केला. अधिक तपास उपनिरीक्षक प्रकाश नेमाणे करीत आहेत.
