नाशिक (इंडिया दर्पण वृत्तसेवा)– किरकोळ कारणातून चार जणांच्या टोळक्याने एकास मारहाण करीत त्याच्या जवळील दागिणे लांबविल्याची घटना महामार्गावरील हॉटेल कशीस पॅलेस भागात घडली. या घटनेत गळयातील आठ तोळे वजनाची सोनसाखळी व दोन सोन्याच्या अंगठ्या काढून घेत भामट्यानी पोबारा केला असून याप्रकरणी इंदिरानगर पोलीस ठाण्यात दुखापत केल्याचा गुन्हा दाखल करण्यात आला आहे.
पोलीसांनी दिलेल्या माहितीनुसार दीपक बोरसे (रा.राणेनगर) व त्याचे तीन साथीदार अशी गुन्हा दाखल करण्यात आलेल्या संशयितांची नावे आहेत. याबाबत योगेश तानाजी आढाव (४० रा.पॅराडाईज अपा.अशोकामार्ग ) यांनी फिर्याद दिली आहे. आढाव गेल्या मंगळवारी (दि.२२) सायंकाळी कशिस पॅलेस हॉटेल भागात गेले असता ही घटना घडली. संशयितानी हॉटेल परिसरातील रस्त्यावर आढाव यांची वाट अडवित तू आज माझ्या घरी का आला होता.
या कारणावरून वाद घालत मारहाण केली. यावेळी बोरसे याने लोखंडी रॉड डोक्यात मारल्याने आढाव जखमी झाले असून टोळक्याने जखमी अवस्थेत त्यांच्या गळय़ातील आठ तोळे वजनाची सोनसाखळी व सुमारे दीड तोळे वजनाच्या दोन अंगठ्या बळजबरीने काढून घेत पोबारा केला आहे. अधिक तपास उपनिरीक्षक पाटील करीत आहेत.
