नाशिक (इंडिया दर्पण वृत्तसेवा)- शहरात घरफोडीची मालिका सुरू असून वेगवेगळया भागात झालेल्या दोन घरफोडीत चोरट्यांनी सुमारे साडे तीन लाखाच्या ऐवजावर डल्ला मारला. त्यात भरदिवसा झालेल्या एका घरफोडीचा समावेश आहे. याप्रकरणी इंदिरानगर व गंगापूर पोलीस ठाण्यात नोंदी करण्यात आल्या आहेत.
आनंदवली शिवारात राहणा-या पल्लवी किशोर पवार (रा.ऋषिकेश मोणार्क अपा.नवश्या गणपती) यांनी दिलेल्या फिर्यादीत म्हटले आहे की, पवार कुटुंबिय दि.१२ ते १६ ऑक्टोबर दरम्यान बाहेर गावी गेले असता ही घरफोडी झाली. अज्ञात चोरट्यांनी त्यांच्या बंद घराचे लॅचलॉक तोडून बेडरूममधील कपाटात ठेवलेली ७० हजाराची रोकड व सोन्याचांदीचे दागिणे असा सुमारे २ लाख ६२ हजार रूपये किमतीचा ऐवज चोरून नेला. याबाबत गंगापूर पोलीस ठाण्यात गुह्याची नोंद करण्यात आली असून अधिक तपास सहाय्यक निरीक्षक अहिरराव करीत आहेत.
दुसरी घटना इंदिरानगर येथील चार्वाक चौक भागात घडली. कविता योगेश काळे (रा.लक्ष्मण अपा.बापू बंगला,सुपर ग्राहक मॉल जवळ) यांनी याबाबत फिर्याद दिली आहे. काळे या बुधवारी (दि.१६) सकाळी अल्पशा कामानिमित्त घराबाहेर पडल्या असता ही घटना घडली. अज्ञात चोरट्यांनी भरदिवसात त्यांच्या बंद घराचे कुलूप तोडून कपाटात ठेवलेली रोकड, मोबाईल व सोन्याचांदीचे दागिणे असा सुमारे ४४ हजार ५०० रूपये किमतीचा ऐवज चोरून नेला. याबाबत इंदिरानगर पोलीस ठाण्यात घरफोडीचा गुन्हा दाखल करण्यात आला असून अधिक तपास हवालदार शेख करीत आहेत.
