नाशिक (इंडिया दर्पण वृत्तसेवा)- देवदर्शन आटोपून गर्दीतून पोत ओवण्यासाठी सराफ बाजाराच्या दिशेने जाणा-या महिलेच्या पर्समधून अलंकाराचा बटवा चोरट्यांनी चोरून नेला. या बटव्यात सुमारे पावणे दोन लाखाचे दागिणे होते. याप्रकरणी सरकारवाडा पोलीस ठाण्यात गुन्हा दाखल करण्यात आला आहे.
ललिता त्र्यंबक सोनवणे (५० रा. तांबोळीनगर,हिरावाडी) यांनी याबाबत फिर्याद दिली आहे. सोनवणे बुधवारी (दि.१६) आपल्या सूनेससोबत घेवून पोत ओवण्यासाठी सराफ बाजारात गेल्या होत्या. सरदार चौकात उतरून सासू सुनेने सांडवा देवीचे दर्शन घेतले.
त्यानंतर गोदाघाटावरून त्या गर्दीतून सराफ बाजारात पोहचल्या असता ही घटना निदर्शनास आली. अज्ञात चोरट्यांनी गर्दीची संधी साधत सोनवणे यांच्या पर्सची चैन उघडून बटवा हातोहात लांबविला. या बटव्यात १ लाख ७६ हजार रूपयांचे दागिणे होते. अधिक तपास जमादार अहिरे करीत आहेत.
