नाशिक (इंडिया दर्पण वृत्तसेवा)- घरात बोलावून घेत एका तृतीय पंथीयाने अल्पवयीन मुलाचा लैंगिक शोषण केल्याचा धक्कादायक प्रकार समोर आला आहे. कुटुंबियांनी मुलास हुडकून काढत संशयितास जाब विचारल्याने संतप्त तृतीय पंथीयाने शिवीगाळ करीत बघून घेण्याची धमकी दिल्याने हा प्रकार पोलीसात पोहचला आहे. पोलीसांनी तात्काळ संशयितास अटक केली असून याप्रकरणी बालकांचा लैंगिक अपराधापासून संरक्षण (पोस्को) कायद्यान्वये गुन्हा दाखल करण्यात आला आहे.
पोलीसांनी दिलेल्या माहितीनुसार तृतीय पंथी सारखा दिसणारा पिंटी नावाच्या इसमास अटक करण्यात आली आहे. पीडित मुलाच्या आईने दिलेल्या फिर्यादीनुसार गुरूवारी (दि.१७) दुपारच्या सुमारास मुलगा खडकाळी भागात आईस्क्रिम खात आपल्या घराकडे जात असताना तृतीयपंथी सारख्या वावरणा-या व्यक्तीने मुलाची वाट अडविली. यावेळी त्याने भावाची शप्पथ घालत मुलास आपल्या घरात येण्याचा आग्रह धरला. मुलाने नकार देताच त्याने भावाच्या स्कुल व्हॅनचा स्फोट होईल असा शाप देण्याची धमकी देत मुलास आपल्या घरात नेले.
बराच वेळ उलटूनही मुलगा घरी न आल्याने पीडित मुलाच्या आईने शोधाशोध केली असता हा प्रकार समोर आला. मुलाच्या आईने अन्य नातेवाईक असलेल्या दोन महिलांना सोबत घेत संशयितास जाब विचारला असता त्याने शिवीगाळ करीत महिलांना बघून घेईल अशी धमकी दिल्याने महिलांनी पोलीसात धाव घेतली असून अधिक तपास सहाय्यक निरीक्षक पवार करीत आहेत.
