नाशिक (इंडिया दर्पण वृत्तसेवा) – फांद्या तोडत असतांना झाडावरून पडल्याने ४० वर्षीय अनोळखी इसमाचा मृत्यू झाला. ही घटना खुटवड नगर भागात घडली. याप्रकरणी अंबड पोलीस ठाण्यात मृत्यूची नोंद करण्यात आली आहे.
पोलीसांनी दिलेल्या माहितीनुसार खुटवडनगर येथील वेनूनगर भागात असलेल्या शिवम रो हाऊस परिसरात ही घटना घडली. सोमवारी (दि.९) सकाळच्या सुमारास ४० वर्षी अनोळखी इसम परिसरातील आंब्याच्या झाडावर फांद्या तोडत होता. अचानक तोल गेल्याने तो जमिनीवर कोसळला होता. या घटनेत त्यास गंभीर दुखापत झाल्याने संदिपकुमार अहिरे यांनी त्यास तातडीने जिल्हारूग्णालयात उपचारार्थ दाखल केले असता वैद्यकीय सुत्रांनी मृत घोषीत केले. अधिक तपास हवालदार टिळेकर करीत आहेत.
तिघा तडिपारांच्या पोलीसांनी मुसक्या आवळल्या.
नाशिक (इंडिया दर्पण वृत्तसेवा) – हद्दपारीची कारवाई करूनही शहरात राजरोस वावरणा-या तिघा तडिपारांच्या पोलीसांनी मुसक्या आवळल्या. त्यातील दोघांच्या बजरंगवाडीत तर एकावर गंगापूररोड भागात कारवाई करण्यात आली असून याप्रकरणी मुंबईनाका आणि गंगापूर पोलीस ठाण्यात गुन्हा दाखल करण्यात आला आहे.
राहूल भीमराव जाधव (२१) व रूपेश मधुकर पीठे (२१ रा. दोघे शनिचौक बजरंगवाडी) व राहूल दिलीप जाधव (२४ रा.जेनिका ग्लोरी सोसा.ध्रुवनगर) अशी कारवाई करण्यात आलेल्या तडिपारांची नावे आहेत. राहूल जाधव, रूपेश पीठे व राहूल दिलीप जाधव याच्या गुन्हेगारी पार्श्वभूमिवर शहर पोलीसांनी त्यांना प्रत्येकी दोन वर्षाच्या कालावधीसाठी शहर आणि जिह्यातून हद्दपार केले आहे.
मात्र तिघांचाही वावर शहरात असल्याची माहिती पोलीसांना मिळाली होती. पोलीस त्यांच्या मागावर असतांना सोमवारी (दि.९) बजरंगवाडीतील दोघांच्या महादेव मंदिर व शनि मंदिर भागात मुसक्या आवळण्यात आल्या. तर ध्रुवनगर येथील जाधवला बारदान फाटा भागात पकडण्यात आले. याबाबत अंमलदार नवनाथ उगले,गणेश बोरणारे व युनिट १चे विलास चारोस्कर यांनी दिलेल्या फिर्यादीवरून पोलीस दप्तरी गुन्हे दाखल करण्यात आले असून अधिक तपास हवालदार पवार, शिंदे व हवालदार महाले करीत आहेत.
