नाशिक (इंडिया दर्पण वृत्तसेवा)- वृध्द आईने जमवून ठेवलेली पुंजी मुलगी व जावयाने हातोहात लांबविल्याचा प्रकार समोर आला आहे. या घटनेत दांम्पत्याने कपाटातील पाच लाख रूपयांच्या रोकडवर डल्ला मारला असून याप्रकरणी इंदिरानगर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार रोहिणी बाविस्कर व सौरब बाविस्कर (रा.दत्तचौक,विजयनगर सिडको) अशी गुन्हा दाखल करण्यात आलेल्या संशयितांची नावे आहेत. याबाबत कल्याणी भगवान विसपुते (रा.पंचमी रेसि.सेल टॅ्क्स आॅफिसजवळ आनंदनगर) यांनी याबाबत फिर्याद दिली आहे. विसपुते यांचे संशयित दाम्पत्य बहिम मेव्हणे आहेत. बाविस्कर दांम्पत्य सोमवारी (दि.७) सायंकाळी विसपुते यांच्या घरी आले होते. आईचे लक्ष नसल्याचे व कपाट उघडे असल्याची संधी साधत दांम्पत्याने कपाटातील पाच लाख रूपयांची रोकड चोरून नेली. ही बाब कल्याणी विसपुते या घरी परतल्यानंतर निदर्शनास आली मायलेकींनी तात्काळ पोलीसात धाव घेतली असून पोलीसांनी वृध्देच्या जावयास अटक केली आहे.
.
३० हजार रूपये किमतीच्या सोनसाखळीवर डल्ला
नाशिक (इंडिया दर्पण वृत्तसेवा)- भरदिवसा उघड्या घरात शिरून चोरट्यांनी सोनसाखळी चोरून नेल्याची घटना सिडकोतील दत्तचौक परिसरात घडली. या घटनेत भामट्यांनी सुमारे ३० हजार रूपये किमतीच्या सोनसाखळीवर डल्ला मारला असून याप्रकरणी अंबड पोलीस ठाण्यात गुन्हा दाखल करण्यात आला आहे.
विक्की विजय गरूड (रा.विठ्ठल रूख्मिनी मंदिराजवळ वृंदावनचौक,दत्तचौक) यांनी फिर्याद दिली आहे. गरूड मंगळवारी (दि.८) सकाळच्या सुमारास अल्पशा कामानिमित्त घराबाहेर पडले असता ही घटना घडली. अज्ञात चोरट्यांने त्यांच्या उघड्या घरात शिरून किचनमधील लोखंडी कपाटाच्या लॉकरमध्ये ठेवलेली सोन्याची चैन चोरून नेली. ही घटना परिसरातील सीसीटिव्ही फुटेजमध्ये कैद झाली असून त्यात २० त २५ वयोगटातील तरूणाने ही चोरी केल्याचे समोर आले आहे. अधिक तपास हवालदार महाजन करीत आहेत.
