नाशिक (इंडिया दर्पण वृत्तसेवा)- हिरावाडीत रिक्षात झोपलेल्या दोघांना उठविल्याने संतप्त दुकलीने डीजे ऑपरेटरला बेदम मारहाण केल्याची घटना घडली. या घटनेत जीवे ठार मारण्याची धमकी देत कोयत्याने वार करण्यात आल्याने डीजे ऑपरेटर जखमी झाला असून, याप्रकरणी पंचवटी पोलीस ठाण्यात गुन्हा दाखल करण्यात आला आहे.
किरण बंडू पगारे (२३ रा. म्हसरूळ) या युवकाने याप्रकरणी फिर्याद दिली आहे. पगारे डीजे ऑपरेटर असून शनिवारी (दि.७) रात्री गणेशाच्या आगमनानिमित्त डीजे वाजविण्यासाठी हिरावाडी भागात गेला होता. मध्यरात्री वाजंत्री वाजविण्याचे काम आटोपून तो मालकाने घरी जाण्यासाठी दिलेल्या व कमलनगर बसस्टॅण्ड जवळ लावलेली अ‍ॅटोरिक्षा घेण्यासाठी गेला असता ही घटना घडली.
पार्क केलेल्या रिक्षात दोन अनोळखी तरूण झोपलेले होते. संबधीतांना त्याने उठविले असता संशयितांनी शिवीगाळ करीत खाली पडलेल्या बांबूने मारहाण केली. या घटनेत एकाने आमच्या बरोबर टाईट बोलला तर जीवे ठार मारू अशी धमकी देत कमरेला लावलेल्या कोयत्या सारख्या धारदार शस्त्राने पाठीमागून वार केला. पगारे याच्या डोक्यावर कोयता मारण्यात आल्याने तो गंभीर जखमी झाला असून अधिक तपास हवालदार घुगे करीत आहेत.
