भरदिवसा उघड्या घरात शिरून चोरट्यांनी सव्वा दोन लाखाच्या ऐवजावर मारला डल्ला
नाशिक (इंडिया दर्पण वृत्तसेवा)– भरदिवसा उघड्या घरात शिरून चोरट्यांनी सुमारे सव्वा दोन लाखाच्या ऐवजावर डल्ला मारला. ही घटना मेरी लिंकरोडवरील दत्तचौक भागात घडली असूनत्यात एक लाखाच्या रोकडसह सोन्याचांदीच्या दागिण्यांचा समावेश आहे. याप्रकरणी पंचवटी पोलीस ठाण्यात गुन्हा दाखल करण्यात आला आहे.
अशोक लक्ष्मण चौधरी (रा.गणेश रो हाऊस,गजानन कॉलनी दत्तचौक) यांनी याबाबत फिर्याद दिली आहे. चौधरी मंगळवारी (दि.८) दुपारी अल्पशाकामानिमित्त घराबाहेर पडले असता ही घटना घडली. अज्ञात चोरट्यांनी उघड्या घरात शिरून बेडरूममधील कपाटात ठेवलेली रोकड व सोन्याचांदीचे दागिणे असा सुमारे २ लाख २६ हजाराचा ऐवज चोरून नेला. अधिक तपास हवालदार माळवाळ करीत आहेत.
वादातून चार जणांच्या टोळक्याने केला प्राणघातक हल्ला
नाशिक (इंडिया दर्पण वृत्तसेवा)– दांम्पत्यास मारहाण केल्याच्या वादातून चार जणांच्या टोळक्याने एकावर प्राणघातक हल्ला केल्याची घटना वडाळा पाथर्डी मार्गावर घडली. या घटनेत हॉकीस्टिकचा वापर करण्यात आल्याने ३२ वर्षीय युवक गंभीर जखमी झाला असून, त्याच्यावर उपचार सुरू आहेत. याप्रकरणी इंदिरानगर पोलीस ठाण्यात चार जणांविरूध्द गुन्हा दाखल करण्यात आला आहे.
पोलीसांनी आशिष दलोड,सिध्दार्थ दलोड,सिध्दांत दलोड व सनी हटवाल (रा.सर्व महालक्ष्मी चाळ,द्वारका) अशी संशयित हल्लेखोरांची नावे आहेत. याबाबत निखील कैलास निकाळे (रा.खुटवडनगर,कामटवाडे) यांनी फिर्याद दिली आहे. निकाळे मंगळवारी (दि.८) शालक सम्राट चंद्रशेखर गायकवाड (रा.पार्क साईड, वडाळा पाथर्डी रोड ) यांच्या घरी गेले होते. दोघे साला मेव्हणे सोसायटीच्या पार्किगमध्ये गप्पा मारत उभे असतांना ही घटना घडली. हातात लाकडी हॉकीस्टीक घेवून आलेल्या संशयित टोळक्याने सम्राट गायकवाड यास शिवीगाळ करीत भाऊ आशिष दलोड व वहिणी शिलालेख यांना का मारहाण केली अशी कुरापत काढून त्यास लाथाबुक्यांनी व हॉकीस्टीकने बेदम मारहाण केली. या घटनेत डोक्यात स्टीकने मारहाण करण्यात आल्याने गायकवाड गंभीर जखमी झाला असून त्याची प्रकृर्ती गंभीर आहे. अधिक तपास उफनिरीक्षक चौधरी करीत आहेत.
