नाशिक (इंडिया दर्पण वृत्तसेवा)- शहरात घरफोडीचे सत्र सुरूच असून वेगवेगळया भागात झालेल्या दोन घरफोडींमध्ये चोरट्यांनी सुमारे सव्वा चार लाख रूपये किमतीच्या ऐवजावर डल्ला मारला. त्यात रोकडसह सोन्याचांदीच्या दागिण्यांचा समावेश आहे. याबाबत गंगापूर व उपनगर पोलीस ठाण्यात गुन्हे दाखल करण्यात आले आहेत.
घरफोडीची पहिली फिर्याद शादाब अनवर शेख (रा. महाले रो हाऊस, पवार हॉस्पिटल मागे, धर्माजी कॉलनी ध्रुवनगर) यानी दिली आहे. शेख कुटुंबिय सोमवारी (दि.१) बाहेरगावी गेले असता ही घटना घडली. अज्ञात चोरट्यांनी बंद घराचा कडीकोयंडा तोडून बेडरूममधील कपाटात ठेवलेली ५५ हजाराची रोकड व सोन्याचांदीचे दागिणे असा सुमारे १ लाख ४२ हजार रूपये किमतीचा ऐवज चोरून नेला. याबाबत गंगापूर पोलीस ठाण्यात गुन्हा दाखल करण्यात आला असून अधिक तपास हवालदार महाले करीत आहेत.
दुसरी घटना जेलरोड भागात घडली. याबाबत नवनीत राकेश चौबे (रा.मनियारी व्हिला,मंगलमुर्ती नगर) यांनी फिर्याद दिली आहे. चौबे कुटुंबिय गेल्या २८ ऑगष्ट रोजी बाहेरगावी गेले असता ही घटना घडली. अज्ञात चोरट्यांनी बंद घराच्या खिडकीचे लोखंडी रॉड तोडून ही घरफोडी केली. घरात शिरलेल्या चोरट्यांनी बेडरूममधील कपाटात ठेवलेली अडीच लाखाची रोकड व सोन्याचांदीचे दागिणे असा सुमारे २ लाख ७८ हजार रूपये किमतीचा ऐवज चोरून नेला. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास सहाय्यक निरीक्षक कल्पेश दाभाडे करीत आहेत.
