नाशिक (इंडिया दर्पण वृत्तसेवा)- शेअर्स मार्केटमध्ये गुंतवणुक करणे शहरातील एकास चांगलेच महागात पडले आहे. गुंतवणुकीवर अधिकच्या नफ्याचे आमिष दाखवून भामट्यांनी सदर व्यक्तीस तब्बल सव्वा सतरा लाख रूपयांना गंडविले आहे. पाच महिने उलटूनही गुंतवणूकीची रक्कम व मोबदला पदरात न पडल्याने गुंतवणुकदाराने पोलीसात धाव घेतली आहे. याप्रकरणी सायबर पोलीस ठाण्यात फसवणुकीसह आयटी अ‍ॅक्ट नुसार गुन्हा दाखल करण्यात आला आहे.
पोलीसांनी दिलेल्या माहितीनुसार गेल्या महिन्या शहरातील गुंतवणुकदाराशी भामट्यांनी संपर्क साधला होता. नुवामा वेल्थ कंपनीचे प्रतिनिधी असल्याचे भासवून कंगना शर्मा, आशिष केहेर व त्यांच्या साथीदारांनी वेगवेगळया नंबरवरून संपर्क साधत शेअर मार्केटमध्ये ट्रेंडिग करून मोठ्या प्रमाणात नफा कमविण्याचे आमिष दाखविले.
यानंतर ठकबाजांनी विश्वास संपादन करीत गुंतवणुकदारास वेगवेगळया बँक खात्यात लाखोंच्या रकमा भरण्यास भाग पाडले. या घटनेत गुंतवणुकदाराची १७ लाख १८ हजार ६३७ रूपयांची फसवणुक झाली आहे. पाच महिने उलटूनही गुंतवणूकीची रक्कम व मोबदला पदरात न पडल्याने संबधीताने पोलीसात धाव घेतली असून अधिक तपास वरिष्ठ निरीक्षक उमेश पाटील करीत आहेत.
