नाशिक (इंडिया दर्पण वृत्तसेवा)- शहरात मोटारसायकल चोरीचे सत्र सुरूच असून वेगवेगळया भागात पार्क केलेल्या चार मोटारसायकली चोरट्यांनी चोरून नेल्या. याप्रकरणी पंचवटी, गंगापूर व उपनगर पोलीस ठाण्यात गुन्हे दाखल करण्यात आले असून चोरट्यांचा बंदोबस्त करावा अशी मागणी जोर धरू लागली आहे.
निमाणी भागात राहणारे चैतन्य नंदन मोहिते (रा.जंगमचौक,राजवाडा निमाणी) यांनी दिलेल्या फिर्यादीनुसार गेल्या शुक्रवारी (दि.५) रात्री ही घटना घडली. मोहिते यांच्यासह शेजारी अतिश सुरेश गाडे याच्या मोटारसायकली चोरट्यानी चोरून नेल्या. एमएच १५ १५ जेजी ९९५५ व एमएच १५ जेएन ७३८६ या दोन्ही मोटारसायकली शुक्रवारी घरासमोर लावलेल्या असतांना त्या चोरट्यांनी पळवून नेल्या. याबाबत पंचवटी पोलीस ठाण्यात एकत्रीत गुन्हा दाखल करण्यात आला असून अधिक तपास हवालदार अमोल पाटील करीत आहेत.
दुसरी घटना गंगापूर गावात घडली. मुर्तुजा शब्बीर नाशिकवाला (रा.फकरी अपा.जेजूरकर लेन मोडेबाबानगर टाकळीरोड) यांनी याबाबत फिर्याद दिली आहे. नाशिकवाला हे गेल्या २६ ऑगष्ट रोजी गंगापूर गावात गेले होते. इडन कॉम्प्लेक्स मधील ट्युलीप अपार्टमेंटच्या पार्किंगमध्ये लावलेली त्यांची एमएच १५ एच एक्स ३९६७ मोटारसायकल चोरट्यांनी चोरून नेली. याबाबत गंगापूर पोलीस ठाण्यात गुन्हा दाखल करण्यात आला असून अधिक तपास हवालदार महाले करीत आहेत.
तर राहूल उत्तम कोरडे (रा.शिंगवे सायखेडा ता.निफाड) हे गेल्या शनिवारी (दि.६) शहरात आले होते. मुक्तीधाम येथील दुर्गा गार्डन भागात लावलेली त्यांची एमएच १५ जीसी २१०९ मोटारसायकल चोरट्यांनी पळवून नेली. याबाबत उपनगर पोलीस ठाण्यात गुन्हा दाखल करण्यात आला असून अधिक तपास जमादार संतोष जाधव करीत आहेत.
………
