नाशिक (इंडिया दर्पण वृत्तसेवा)– शहरातील भरवस्तीत गावठी दारूचे गाळप केले जात असल्याचे वास्तव समोर आले आहे. गोसावी वाडी भागात छापा टाकून पोलीसानी हातभट्टी उध्वस्त केली असून या कारवाईत महिलेसह अन्य एकास बेड्या ठोकत पथकाने सुमारे रसायणासह गावठी दारू असा सुमारे २५ हजार रूपये किमतीचा मुद्देमाल हस्तगत केला आहे. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
महेश रघूनाथ पिंपळे (४९) व अरूणा चेतन पिंपळे (२३) रा. दोघे पिंपळे सदन गोसावी वाडी ना,रोड) अशी गुन्हा दाखल करण्यात आलेल्या संशयितांची नावे आहेत. याबाबत अंमलदार नितीन भामरे यांनी फिर्याद दिली आहे. गोसावीवाडीतील एका घरात गावठी दारूचे गाळप केले जात असल्याची माहिती नाशिकरोड पोलीसांना मिळाली होती. त्यानुसार शुक्रवारी (दि. २९) रात्री पथकाने छापा टाकला असता दोघे दारू गाळप करतांना मिळून आले.
घटनास्थळावरून रसायणासह गावठी दारू व दारू गाळप करण्यासाठी लागणारे साहित्य असा सुमारे २४ हजार ९०० रूपये किमतीचा मुद्देमाल जप्त करण्यात आला असून अधिक तपास हवालदार गायकवाड करीत आहेत.
