नाशिक (इंडिया दर्पण वृत्तसेवा) – भाजीपाला खरेदी करून घराकडे परतणा-या दोघा बहिणींपैकी एकीच्या गळय़ातील सोन्याचे मंगळसूत्र दुचाकीस्वार भामट्यांनी ओरबाडून नेले. ही घटना संघ मित्रा सोसायटी समोर घडली. या घटनेत सुमारे ३३ हजाराच्या मंगळसुत्रावर चोरट्यांनी डल्ला मारला असून याप्रकरणी उपनगर पोलीस ठाण्यात जबरीचोरीचा गुन्हा दाखल करण्यात आला आहे.
सोनाली रेणूकादास सोमवंशी (५२ रा.पुंजादर्शन सोसा.जगतापमळा ना.रोड) यांनी याबाबत फिर्याद दिली आहे. सोमवंशी या मंगळवारी (दि.२७) सायंकाळी बहिण स्मिता सोमवंशी यांना सोबत घेवून भाजीपाला खरेदी करण्यासाठी गेल्या होत्या. परिसरातील शांती पार्क भागातून भाजीपाला खरेदी करून दोघी बहिणी रस्त्याने पायी आपल्या घराकडे जात असतांना ही घटना घडली.
गोल्डन ब्रिक्स सोसायटी जवळून त्या पायी जात असतांना विरूध्द दिशेने अ‍ॅक्टीव्हावर आलेल्या भामट्यांनी सोनाली सोमवंशी यांच्या गळयातील सुमारे ३३ हजार रूपये किमतीचे मंगळसूत्र हिसकावून नेले. अधिक तपास उपनिरीक्षक पावरा करीत आहेत.
