नाशिक (इंडिया दर्पण वृत्तसेवा)- ३१ वर्षीय युवकाची खत प्रकल्पा समोरील बाजूस निर्घृण हत्या करण्यात आल्याची धक्कादायक घटना घडली. शुक्रवार ८ नोव्हेंबर रोजी रात्रीच्या सुमारास इंदिरानगर पोलीस ठाणे हद्दीतील हा खून झाला. योगेश बत्तासे (वय ३१ रा. नांदगाव, जि. नाशिक) असे मृत तरुणाचे नाव आहे. या घटनेचे कारण स्पष्ट झाले नसले तरी प्रेमप्रकरणातून हा खून झाल्याचा प्राथमिक अंदाज आहे.
या घटनेबाबत पोलिसांनी दिलेली माहिती अशी की, पांडवलेणीच्या मागच्या बाजूस असलेल्या खत प्रकल्पा समोरील निर्जळ ठिकाणी डोक्यात दगड घालून हा खून करण्यात आला. या घटनेची माहिती मिळताच इंदिरानगर पोलिस घटनास्थळी दाखल झाले.
दोन दिवसांपासून योगेश सुभाष बत्तासे हा मिसिंग असल्याचे त्याच्या नातेवाईकांनी नांदगांव पोलिस ठाण्यात नोंद केली आहे. या प्रकरणी एका संशयितास चौकशीसाठी ताब्यात घेतले असून इंदिरानगर पोलिस अधीक तपास करीत आहेत.
दरम्यान घटनास्थळी तात्काळ पोलिस उपायुक्त मोनिका राऊत, प्रशांत बच्छाव तसेच सहाय्यक पोलिस आयुक्त शेखर देशमुख यांनी धाव घेत पोलिस निरीक्षक रामदास शेळके, दुय्यम पोलिस निरीक्षक सुनील अंकोलीकर यांना तपासाबाबतच्या सुचना केल्या.
