नाशिक (इंडिया दर्पण वृत्तसेवा) – सिडकोतील पांगरे मळा भागात झालेल्या घरफोडीत चोरट्यांनी सुमारे सव्वा लाखाच्या ऐवजावर डल्ला मारला. त्यात २५ हजाराच्या रोकडसह सोन्याचांदीच्या दागिण्यांचा समावेश आहे. याप्रकरणी अंबड पोलीस ठाण्यात घरफोडीचा गुन्हा दाखल करण्यात आला आहे.
रामकृष्ण वामन खैरणार (रा.मंगलमुर्ती नगर,पांगरेमळा) यांनी याबाबत फिर्याद दिली आहे. खैरणार कुटूंबिय शुक्रवारी (दि.३०) मुंबई येथे गेले असता ही घटना घडली. अज्ञात चोरट्यांनी त्यांच्या बंद घराच्या खिडकीचे गज कापून ही चोरी केली.
घरात शिरलेल्या चोरट्यांनी बेडरूममधील लोखंडी कपाटातील लॉकरमध्ये ठेवलेली २५ हजाराची रोकड व सोन्याचांदीचे दागिणे असा सुमारे १ लाख २७ हजाराचा ऐवज चोरून नेला. अधिक तपास वरिष्ठ निरीक्षक सुनिल पवार यांच्या मार्गदर्शनाखाली उपनिरीक्षक शेवाळे करीत आहेत.
