नाशिक (इंडिया दर्पण वृत्तसेवा)- गांजा या अमली पदार्थाची विक्री करणारी महिला पोलीसांच्या जाळयात अडकली. संशयित महिलेच्या झडतीत सुमारे २० हजार रूपये किमतीचा अडिच किलो गांजा मिळून आला असून याप्रकरणी उपनगर पोलीस ठाण्यात गुन्हा दाखल करण्यात आला आहे.
जैरूनिसा हजरत मन्सुरी (४३ रा.गुलाबवाडी, मालधक्कारोड, देवळालीगाव) असे अटक करण्यात आलेल्या महिलेचे नाव आहे. उपनगर परिसरातील गोल्डन ब्रिस्क सोसायटी भागात एक महिला गांजाची विक्री करीत असल्याची माहिती पोलीसांना मिळाली होती.
त्यानुसार पोलीसांनी मंगळवारी (दि.२७) धाव घेत सदर महिलेची झडती घेतली असता तिच्याकडील कापडी पिशवीत सुमारे २० हजार रूपये किमतीचा गांजा,वजनकाटा व प्लॅस्टीक पिशव्या आढळून आल्या. पथकाने सदर महिलेच्या मुसक्या आवळत मुद्देमाल हस्तगत केला असून अधिक तपास उपनिरीक्षक प्रभाकर सोनवणे करीत आहेत.
