नाशिक (इंडिया दर्पण वृत्तसेवा)- औषधे घेवून घराकडे पायी जाणा-या महिलेच्या गळयातील मंगळसूत्र दुचाकीस्वार भामट्यांनी ओरबाडून नेले ही घटना मधुबन कॉलनी भागात घडली. या घटनेत ४५ हजाराचे मंगळसुत्र चोरट्यांनी हिसकावून नेले असून, याप्रकरणी पंचवटी पोलीस ठाण्यात जबरीचोरीचा गुन्हा दाखल करण्यात आला आहे.
वंदना भागवत चौधरी (रा.चव्हाण चाळ,सावरकर चौक,नवनाथनगर,पेठरोड) यांनी फिर्याद दिली आहे. चौधरी मंगळवारी (दि.२७) रात्री नऊ वाजेच्या सुमारास गोळया औषधे घेण्यासाठी मधुबन कॉलनी भागात गेल्या होत्या. गणेश मेडिकल मधून औषधे घेवून त्या मधुबन कॉलनीकडून नवनाथनगरच्या दिशेने पायी जात असतांना ही घटना घडली. दिपाली अपार्टमेंटसमोरून त्या पायी जात असतांना अ‍ॅक्टीव्हावर आलेल्या भामट्यांनी त्यांच्या गळ््यातील सुमारे ४५ हजार रूपये किमतीचे सोन्याचे मंगळसुत्र हिसकावून पोबारा केला. अधिक तपास जमादार जाधव करीत आहेत.
कोयता घेवून फिरणा-यावर पोलीसांची कारवाई
नाशिक (इंडिया दर्पण वृत्तसेवा)– देवळाली कॅम्प येथील जुने बस स्टॅण्ड भागात कोयता घेवून फिरणा-या एकावर पोलीसांनी कारवाई केली. या कारवाईत संशयिताच्या ताब्यातून धारदार लोखंडी कोयता हस्तगत करण्यात आला असून याप्रकरणी पोलीस दप्तरी भारतीय हत्यार कायद्यान्वये गुन्हा दाखल करण्यात आला आहे.
शादाब जाकिर सय्यद (२८ रा.काळे चाळ,हाडोळा) असे गुन्हा दाखल करण्यात आलेल्या संशयित कोयताधारीचे नाव आहे. जुने बसस्टॅण्ड भागात फिरणाºया तरूणाकडे धारदार शस्त्र असल्याची माहिती पोलीसांना मिळाली होती. त्यानुसार मंगळवारी (दि.२७) सायंकाळी पथकाने धाव घेत संशयिताची अंगझडती घेतली असता त्यांच्या ताब्यात धारदार कोयता मिळून आला. याबाबत हवालदार सुभाष जाधव यांनी दिलेल्या फिर्यादीवरून गुह्याची नोंद करण्यात आली असून अधिक तपास जमादार पानसरे करीत आहेत.
