नाशिक (इंडिया दर्पण वृत्तसेवा)- जुने नाशिक भागात मुलांचा वाद मिटविण्यासाठी गेलेल्या महिलेचा सराईताने विनयभंग केल्याची घटना घडली. या घटनेत मुलीच्या कानशिलेत लगावत संशयिताने एकास चाकूचा धाक दाखवित जीवे ठार मारण्याची धमकी देत हे कृत्य केले असून याप्रकरणी भद्रकाली पोलीस ठाण्यात विनयभंगासह विविध कलमान्वये गुन्हा दाकल करण्यात आला आहे.
उद्देश कैलास कुंभकर्ण उर्फ मुन्ना कासार असे गुन्हा दाखल करण्यात आलेल्या संशयिताचे नाव आहे. संशयित पोलीस रेकॉर्डवरील गुन्हेगार असून त्याच्याविरूध्द सरकारवाडा आणि भद्रकाली पोलीस ठाण्यात अनेक गंभीर गुन्हे दाखल आहेत. पिडीतेने दिलेल्या फिर्यादीनुसार मंगळवारी (दि.१३) रात्री ही घटना घडली. संशयित महिलेच्या घरासमोर त्यांच्या मुलांशी वाद घालत होता.
यावेळी महिला व तिची मुलगी आणि गल्लीतील एक तरूण हा वाद मिटविण्यासाठी गेले असता ही घटना घडली. मायलेकी समजवून सांगत असतांना संतप्त संशयिताने शिवीगाळ करीत मुलीच्या कानशिलेत लगावत महिलेचा विनयभंग केला तर यावेळी मदतीसाठी धावून आलेल्या तरूणास संशयिताने चाकू लागून तुम्हाला कोणालाच सोडणार नाही अशी धमकी दिली. अधिक तपास उपनिरीक्षक रणदिवे करीत आहेत.
