नाशिक (इंडिया दर्पण वृत्तसेवा) – हिरावाडीतील तांबोळीनगर भागात गॅस गिझरचा भडका उडाल्याने भाजलेल्या एकाचा मृत्यू झाला. या घटनेत ५९ वर्षीय व्यक्ती गंभीर भाजला होता उपचार सुरू असतांना त्यांचा मृत्यू झाला. याप्रकरणी पंचवटी पोलीस ठाण्यात मृत्यूची नोंद करण्यात आली आहे.
सुरेश बाबुराव दामोदरे (रा. निळकंठ अपा.तांबोळीनगर) असे मृत व्यक्तीचे नाव आहे. दामोदरे गेल्या सोमवारी (दि.१९) सकाळच्या सुमारास आपल्या राहत्या घरातील बाथरूममध्ये आंघोळ करीत असतांना ही घटना घडली होती. गॅस गळतीमुळे बाथरूममध्ये लावलेल्या गिझरचा अचानक भडका उडाला होता. या घटनेत सुरेश दामोदरे गंभीर भाजले होते.
मुलगा विनोद दामोदरे यांनी त्यांना तातडीने मुंबईनाका परिसरातील वेदांत हॉस्पिटल येथे दाखल केले असता उपचार सुरू असतांना रविवारी (दि.२५) डॉ. अभिषेक कुलकर्णी यांनी त्यांना मृत घोषीत केले. याबाबत डॉ.प्रकाश पवार यांनी दिलेल्या खबरीवरून मृत्यूची नोंद करण्यात आली असून अधिक तपास हवालदार घुगे करीत आहेत.
