नाशिक (इंडिया दर्पण वृत्तसेवा) – रस्त्याने पायी जाणा-या अल्पवयीन मुलीसह नोकरदार तरूणीची वाट अडवित दोघांनी विनयभंग केल्याचा प्रकार समोर आला आहे. त्यात एका परिचीतासह अनोळखी दुचाकीस्वाराचा समावेश असून वेगवेगळया ठिकाणी घडलेल्या घटनांबाबत पंचवटी व मुंबईनाका पोलीस ठाण्यात गुन्हे दाखल करण्यात आले आहेत.
पंचवटीतील लोखंडे मळा भागात राहणारी तरूणी शुक्रवारी (दि.२३) रात्री शिकवणीवरून घराकडे पायी जात असतांना ही घटना घडली. रस्त्याने ती पायी घराकडे जात असतांना अॅक्टीव्हावर आलेल्या तरूणाने पत्ता विचारण्याच्या बहाण्याने तिचा विनयभंग केला. याप्रकरणी पचवटी पोलीस ठाण्यात विनयभंगासह बालकांचे लैंगिक अपराध संरक्षण कायद्यान्वये गुन्हा दाखल करण्यात आला असून अधिक तपास उपनिरीक्षक सचिन चव्हाण करीत आहेत.
दुसरी घटना ऋणानुबंध मंगल कार्यालय भागात घडली. पीडिता गेल्या शुक्रवारी (दि.९) कामावर जात असतांना घरा समोर राहणा-या परिचीत संशयिताने तिचा दुचाकीवर पाठलाग करून वाट अडविली. यावेळी त्याने गाडीवर बस मी तुला सोडतो असे म्हणत तरूणीचा विनयभंग केला. याप्रकरणी मुंबईनाका पोलीस ठाण्यात गुन्हा दाखल करण्यात आला असून अधिक तपास हवालदार यादव डंबाळे करीत आहेत.
