नाशिक (इंडिया दर्पण वृत्तसेवा)- विरूध्द दिशेने आलेल्या चार जणांच्या टोळक्याने दुचाकीस समोरासमोर धडक देत दुचाकीस्वारास बेदम मारहाण केल्याची घटना कॉलेजरोड भागात घडली. या घटनेत तरूणाच्या डोक्यात सिमेंटचा दगड मारण्यात आल्याने तो जखमी झाला असून याप्रकरणी गंगापूर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार शुभम महेश सोनार (२८ रा.पवार मळा,विठाई नगर पेठरोड) या युवकाने फिर्याद दिली आहे. सोनार गुरूवारी (दि.२२) कॉलेजरोड भागात गेला होता. दुपारच्या सुमारास तो एमएच १५ जीसी ३२७१ या दुचाकीने घराकडे परतत असतांना ही घटना घडली. एचपीटी महाविद्यालयासमोरील मार्गाने तो मॉडेल चौकाच्या दिशेने तो प्रवास करीत असतांना काही अंतरावरच विरूध्द दिशेने भरधाव आलेल्या मोपेडस्वारांनी त्याच्या दुचाकीस धडक दिली. याअपघातानंतर संतप्त अनोळखी चार जणांच्या टोळक्याने त्यास शिवीगाळ करीत लाथाबुक्यानी मारहाण केली. याप्रसंगी एकाने पडलेला सिमेंटचा दगड डोक्यात मारल्याने शुभम सोनार जखमी झाला असून अधिक तपास हवालदार पगार करीत आहेत.
मायलेकावर कोयत्याने हल्ला
नाशिक (इंडिया दर्पण वृत्तसेवा)- रस्त्याने पायी जाणा-या मायलेकावर एकाने कोयत्याने हल्ला केल्याची घटना शिंदे गावात घडली. पूर्ववैमनस्यातून घडलेल्या या घटनेत मुलगा जखमी झाला असून याप्रकरणी सागर पिंगळे नामक संशयिताविरोधात नाशिकरोड पोलीस ठाण्यात गुन्हा दाखल करण्यात आला आहे.
सरला पोपट पिंगळे (रा.नायेगाव ता.सिन्नर) यांनी याबाबत फिर्याद दिली आहे. संशयित व फिर्यादी एकमेकांचे परिचीत असून ते एकाच गावात राहतात. महिलेच्या मुलाशी झालेल्या जुन्या वादातून ही घटना घडली. सरला पिंगळे व अंकुश पिंगळे हे मायलेक बुधवारी (दि.२१) सकाळच्या सुमारास शिंदे गावातून आपल्या घराकडे पायी जात असतांना पाटाजवळ भेटलेल्या संशयिताने जुन्या वादाची कुरापत काढून हा हल्ला केला. या घटनेत चारा कापण्याच्या कोयत्याने मुलाच्या डोक्यावर तर महिेच्या हातावर धारदार कोयत्याने वार करण्यात आला आहे. मायलेकांनी वेळीच प्रतिकार केल्याने ते बालंबाल बचावले असून अधिक तपास पोलीस नाईक पवार करीत आहेत.
