नाशिक (इंडिया दर्पण वृत्तसेवा)– किरकोळ कारणातून घरात घुसून तीन महिलांनी मायलेकींना मारहाण केल्याची घटना काठेगल्ली भागात घडली. या घटनेत जीवे ठार मारण्याची धमकी देत तिघा महिलानी घरातील सामान अस्ताव्यस्त फेकल्याने मोठे नुकसान झाले आहे. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
पोलीसानी दिलेल्या माहितीनुसार ज्योती बिडलॉन, सृष्टी व परी बिडलॉन (रा. वाल्मिकनगर,वडाळानाका) अशी गुन्हा दाखल करण्यात आलेल्या संशयितांची नावे आहेत. याबाबत प्रिया चव्हाण (रा.बनकर चौक,काठेगल्ली) यांनी फिर्याद दिली आहे. प्रिया चव्हाण व त्यांची आई सुनिता चव्हाण या मायलेकी बुधवारी (दि.२१) आपल्या घरात असतांना संशयित महिलांनी बेकायदा प्रवेश केला. तुझे वडिल महात्मा फुले योजनेचे प्रकरण करून देत असतांना तु का आडवी येते असे म्हणत तिघा महिलांनी शिवीगाळ व जीवे ठार मारण्याची धमकी देत प्रिया चव्हाण यांना मारहाण केली.
यावेळी त्यांची आई आपल्या मुलीच्या बचावासाठी धावून आल्या असता संशयित महिलानी त्यानाही मारहाण केली. यावेळी संतप्त महिलानी घरातील सामान अस्ताव्यस्त फेकल्याने मोठे नुकसान झाले असून अधिक तपास उपनिरीक्षक गवांदे करीत आहेत.
