नाशिक (इंडिया दर्पण वृत्तसेवा)- बहिणींसमवेत रस्त्याने पायी जाणा-या भावाच्या गळयातील सोनसाखळी भामट्या दुचाकीस्वारांनी ओरबाडून नेल्याची घटना वृदावननगर भागात घडली. या घटनेत सुमारे अडिच तोळे वजनाच्या सोनसाखळीवर भामट्यांनी डल्ला मारला असून याप्रकरणी म्हसरूळ पोलीस ठाण्यात जबरीचोरीचा गुन्हा दाखल करण्यात आला आहे.
गणेश नारायण खैरणार (५६ रा.चेंबुर,मुंबई) यांनी याबाबत फिर्याद दिली आहे. खैरणार रविवारी (दि.१८) रक्षाबंधनानिमित्त शहरात आले होते. बहिण भाऊ एकत्रीत जमल्याने रात्रीच्या वेळी ते बहिणींना सोबत घेवून परिसरातील जुन्या घराकडे फेरफटका मारण्यासाठी जात असतांना ही घटना घडली.
तिघा बहिणींशी ते गप्पा मारत रस्त्याने जात असतांना वृंदावननगर येथील कडलग पिठाची गिरणी भागात दुचाकीवर डबलसिट आलेल्या भामट्यांनी त्यांच्या गळयातील अडिच तोळे वजनाची व सुमारे दीड लाख रूपये किमतीची सोनसाखळी ओरबाडून नेली. अधिक तपास उपनिरीक्षक मनोहर क्षिरसागर करीत आहेत.
