नाशिक (इंडिया दर्पण वृत्तसेवा) – दुचाकीवर अनोळखी तरूणास लिफ्ट देणे एका वृध्दास चांगलेच महागात पडले आहे. तरूणाने आपल्या साथीदारास निर्जनस्थळी बोलावून घेत वृध्दास मारहाण करीत लुटले असून या घटनेत भामट्यांनी अ‍ॅक्टीव्हासह सोन्याचांदीचे दागिणे व मोबाईल बळजबरीने हिसकावून पोबारा केला आहे. याप्रकरणी उपनगर पोलीस ठाण्यात जबरीचोरीचा गुन्हा दाखल करण्यात आला आहे.
अ‍ॅन्थेनी गॅब्रिअल साळवे (६५ रा. जेलरोड) यांनी याबाबत फिर्याद दिली आहे. साळवे शुक्रवारी (दि.१६) नाशिकरोड येथील सेंट अण्णा चर्च येथे गेले होते. रात्री साडे दहा वाजेच्या सुमारास ते घराकडे परतण्यासाठी चर्च बाहेर पडले असता ही घटना घडली. चर्च परिसरात पार्क केलेली अ‍ॅक्टीव्हा एमएच १५ ईएम ६३३१ काढून ते प्रवासाला लागले असता चर्च भागातच त्यांना एका तरूणाने गाठून लिफ्ट मागितली.
साळवे यांनी संशयितास दुचाकीवर डबलसिट बसवून प्रवासास लागले असता संशयिताने क्रोमा शोरूम भागातील मोकळ््या जागी मैदानावर घेवून जात ही लुटमार केली. याठिकाणी संशयिताने फोन करून एका साथीदाराला बोलाविले.त्यानंतर दोघांनी मिळून साळवे यांना बेदम मारहाण केली. तसेच त्यांचा मोबाईल बळजबरीने हिसकावून घेत दुकलीने त्यांच्या हातातील सोन्याचांदीच्या अंगठ्या, एटीएम कार्ड काढून घेत दुचाकी घेवून पोबारा केला. अधिक तपास उपनिरीक्षक पवार करीत आहेत.
