नाशिक (इंडिया दर्पण वृत्तसेवा)- शहरात आत्महत्येची मालिका सुरूच असून शुक्रवारी (दि.१६) वेगवेगळया भागात राहणा-या तीन तरूणांनी आत्महत्या केली. त्यातील दोघांनी गळफास लावून घेत तर एकाने विषारी औषध सेवन करून आपले जीवन संपविले. तिघांच्याही आत्महत्येचे कारण समजू शकले नाही. याप्रकरणी मुंबईनाका,पंचवटी व उपनगर पोलीस ठाण्यात मृत्यूच्या नोंदी करण्यात आल्या आहेत.
भारतनगर येथील शिवाजीवाडीत राहणा-या दुर्गेश केवल मेहरा (२५) या युवकाने गुरूवारी (दि.१५) सायंकाळी अज्ञात कारणातून आपल्या राहत्या घरात विषारी औषध सेवन केले होते. ही बाब निदर्शनास येताच कुटूंबियांनी त्यास जिल्हारूग्णालयात दाखल केले असता शुक्रवारी रात्री त्यास उपचार सुरू असतांना वैद्यकीय सुत्रांनी मृत घोषीत केले. याबाबत मुंबईनाका पोलीस ठाण्यात मृत्यूची नोंद करण्यात आली असून अधिक तपास हवालदार म्हैसधुणे करीत आहेत. दुसरी घटना मखमलाबाद लिंकरोड भागात घडली. हर्षल संजय सोनकांबळे (२२ रा.प्लेबॉक्स क्रिकेट ग्राऊंड, इम्पेरिअल बिल्डींग समोर) या तरूणाने शुक्रवारी (दि.१६) अज्ञात कारणातून क्रिकेट ग्राऊंड लगत असलेल्या लोखंडी कॅबीनमधील सिलींगला दोरी बांधून गळफास लावून घेतला होता. ही बाब निदर्शनास येताच त्यास जिल्हारूग्णालयात दाखल केले असता डॉ. प्रतिभा पगार यांनी उपचारापूर्वी तपासून मृत घोषीत केले. याबाबत पंचवटी पोलीस ठाण्यात मृत्यूची नोंद करण्यात आली असून अधिक तपास हवालदार शेळके करीत आहेत.
तर वाल्मिक बाळासाहेब राऊत (२७ रा. ओमकार अपा.औटेमळा नाशिकरोड) या युवकाने गुरूवारी (दि.१५) रात्री अज्ञात कारणातून आपल्या राहत्या घरात गॅलरीच्या हुकाला उपरणे बांधून गळफास लावून घेतला होता. वडिल बाळासाहेब राऊत यांनी त्यास तातडीने बिटको रूग्णालयात दाखल केले असता वैद्यकीय सुत्रांनी तपासून मृत घोषीत केले. याबाबत उपनगर पोलीस ठाण्यात मृत्यूची नोंद करण्यात आली असून अधिक तपास पोलीस नाईक बोडके करीत आहेत.
