नाशिक (इंडिया दर्पण वृत्तसेवा) – सिन्नरचे आमदार व राज्याचे कृषी मंत्री माणिकराव कोकाटे व त्याचे बंधु सुनील कोकाटे यांना नाशिक जिल्हा सत्र न्यायालयाने मोठा दिलासा दिला आहे. याअगोदर ट्रायल कोर्टाने दोन वर्षाची शिक्षा ठोठावली होती. त्यानंतर आज अपील चालेपर्यंत त्यांच्या शिक्षेला स्थगिती देण्यात आल्याची माहिती त्यांच्या वकिलांनी दिली.
१९९५ ते १९९७ या काळात माणिकराव कोकाटे व त्यांचे बंधू सुनील कोकाटे यांनी शासनाकडून ज्या सदनिका मिळतात. त्या सदनिका घेतल्या होत्या. त्यावेळेस त्यांनी सांगितले होते की आमचे उत्पन्न कमी आहे. आम्हाला दुसरे घर नाही. त्या सदनिका त्यांना शासनाच्या माध्यमातून मिळाल्या होत्या. त्यावेळेस माजी मंत्री तुकाराम दिघोळे यांनी या प्रकरणी याचिका दाखल केली होती. त्याचा निकाल काही दिवसापूर्वी न्यायालयाने दिला होता. त्यात दोन वर्षाची शिक्षा ठोठावली होती.
सरकारवाडा पोलिस स्टेशनमध्ये गुन्हा
कागदपत्रांची फेरफार आणि फसवणूक केल्याचा आरोप करत माजी मंत्री दिघोळे यांनी याचिका दाखल केली होती. याबाबतचा गुन्हा नाशिकच्या सरकारवाडा पोलिस ठाण्यामध्ये दाखल करण्यात आला होता. कोकाटे बंधुसह इतर दोघांचा आरोपीत समावेश होता. पण, कोर्टाने त्यांना शिक्षा सुनावली नाही.
हा आहे लोकप्रतिनिधी कायदा
लोकप्रतिनिधीला दोन किंवा त्यापेक्षा जास्त वर्षाची कारावासाची शिक्षा सुनावल्यास त्याचे सभागृह सदस्यत्व रद्द होते. पण, या शिक्षेला तूर्त स्थगिती देण्यात आली आहे. त्यामुळे सत्र न्यायालयात अपीलची सुनावणीपर्यंत त्यांच्यावर कोणतीही कारवाई होणार नाही.
