गंजमाळला भरदिवसा घरफोडी
नाशिक – कुटूंबिय घरात नसल्याची संधी साधत अज्ञात चोरट्यांनी भरदिवसा बंद घराचा कडीकोयंडा तोडून कपाटातील सुमारे ८६ हजाराचे सोन्याचांदीचे दागिणे चोरून नेले. ही घटना गंजमाळ भागातील पंचशिलनगर येथे घडली. याप्रकरणी भद्रकाली पोलीस ठाण्यात घरफोडीचा गुन्हा दाखल करण्यात आला आहे.
आशा अशोक सावंत (रा.डॉ.आंबेडकर पुतळा मागे,पंचशिलनगर) यांनी याप्रकरणी तक्रार दाखल केली आहे. सावंत कुटूंबिय मंगळवारी (दि.२१) सकाळच्या सुमारास कामानिमित्त घराबाहेर पडले असता अज्ञात चोरट्यांनी बंद घराच्या मागील दरवाजाचा कडीकोयंडा तोडून कपाटात ठेवलेले दागिणे चोरून नेले. अधिक तपास सहाय्यक निरीक्षक आहिरे करीत आहेत.
…
भाजीबाजारात मोबाईल चोरी
नाशिक – भाजीपाला खरेदीसाठी गेलेल्या वृध्द ग्राहकाच्या खिशातील मोबाईल चोरट्यांनी चोरून नेल्याची घटना पेठरोडवरील सांगळे हॉस्पिटल समोरील भाजी मार्केट मध्ये घडली. याप्रकरणी म्हसरूळ पोलीस ठाण्यात चोरीचा गुन्हा दाखल करण्यात आला आहे.
कचरू गणपत काकड (७० रा.मखमलाबाद लिंकरोड) यांनी याप्रकरणी तक्रार दाखल केली आहे. काकड गेल्या शनिवारी भाजीपाला खरेदी करण्यासाठी पेठरोड भागात गेले होेते. सांगळे हॉस्पिटल समोर ते भाजीपाला खरेदी करीत असतांना ही घटना घडली. गर्दीची संधी साधत अज्ञात चोरट्यांनी त्यांच्या खिशातील मोबाईल हातोहात लांबविला. अधिक तपास पोलीस नाईक गवारे करीत आहेत.
……
शहरातून तीन मोटारसायकल लंपास
नाशिक – शहरात मोटारसायकल चोरीची मालिका सुरू असून, नुकत्याच वेगवेगळ््या भागात पार्क केलेल्या दुचाकी चोरट्यांनी चोरून नेल्या. याप्रकरणी म्हसरूळ, उपनगर आणि नाशिकरोड पोलीस ठाण्यात गुन्हे दाखल करण्यात आले आहेत.
हनुमान वाडीतील बाळासाहेब जगन्नाथ चौधरी (रा.चौधरी मळा) हे गेल्या गुरूवारी (दि.१६) दिंडोरीरोड भागात गेले होते. आरटीओ कॉर्नर येथील राजस्विट दुकानासमोर पार्क केलेली त्यांची शाईन एमएच १५ एफडब्ल्यू ०१०९ चोरट्यांनी चोरून नेली. याप्रकरणी म्हसरूळ पोलीस ठाण्यात गुन्हा दाखल करण्यात आला असून अधिक तपास हवालदार हळदे करीत आहेत.
दुसरी घटना चेहडीपंपीग भागात घडली. नितेश धोंडीबाजी बडोदे (रा. पारस अव्हेन्यु.जुना मालधक्का रोड) यांनी याप्रकरणी तक्रार दाखल केली आहे. बडोदे यांची यामाहा एमएच १५ एक्स ५९४२ दुचाकी मंगळवारी (दि.२१) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी नाशिकरोड पोलीस ठाण्यात गुन्हा दाखल करण्यात आला असून अधिक तपास जमादार काकड करीत आहेत.
तर सागर रमेश यशवंते (रा.सेंट्रल जेल समोर,भिमनगर) हे मंगळवारी (दि.२१) रात्री आगर टाकळी भागात गेले होते. वैदूवाडीत लावलेली त्यांची पल्सर एमएच १५ जीयू ८८२० चोरट्यांनी चोरून नेली. याप्रकरणी उपनगर पोलीस ठाण्यात गुन्हा दाखल करण्यात आला असून अधिक तपास हवालदार माळोदे करीत आहेत.
