शिवसेना, सत्कार्य फाउंडेशनचा पाठपुरावा
नाशिक – नंदिनी नदीचे संरक्षण व्हावे आणि प्रदूषण रोखले जावे, यासाठी या नदीच्या दोन्ही किनारी उंटवाडी ते गोविंदनगरपर्यंत दहा ठिकाणी एकूण २६ कॅमेरे बसविण्याचे स्मार्ट सिटीने निश्चित केले आहे. याबाबतचे पत्र शिवसेना (उद्धव बाळासाहेब ठाकरे) पक्ष व सत्कार्य फाउंडेशनला प्राप्त झाले आहे, अशी माहिती बाबासाहेब गायकवाड (देशमुख) यांनी दिली. कार्यवाही सुरू केल्याबद्दल महापालिका व स्मार्ट सिटीचे आभार मानण्यात आले आहे.
गोदावरीची उपनदी असलेल्या नंदिनी नदीमध्ये मोठ्या प्रमाणात घाण व कचरा टाकून प्रदूषण केले जाते, वाळू उपसाही मोठ्या प्रमाणात केला जातो. मद्यपी, गर्दुल्ले हे नदीपात्रात येवून बसतात, लपण्यासाठी गुन्हेगारही येथे आश्रय घेतात. नंदिनीमुळे गोदावरीचेही प्रदूषण वाढते. नागरिकांना गुन्हेगारीचा त्रास होतोच; परंतु त्यांचे आरोग्यही धोक्यात येते. प्रदूषण रोखण्याला मदत व्हावी, नदी व परिसरातील नागरिकांचे संरक्षण व्हावे, यासाठी नदीच्या दोन्ही किनारी उंटवाडी ते गोविंदनगरपर्यंत सीसीटीव्ही कॅमेरे बसविण्यात यावे, अशी मागणी शिवसेना, सत्कार्य फाउंडेशनने बाबासाहेब गायकवाड (देशमुख), चारुशीला गायकवाड (देशमुख) यांच्या पुढाकाराने महापालिका आयुक्त आणि स्मार्ट सिटीकडे ७ व ८ डिसेंबर २०२१ रोजी केली होती. गायकवाड दाम्पत्याने सतत पाठपुरावा केला. महापालिका आयुक्तांनी या विषयाला १६ मार्च २०२२ ला मंजुरी देवून त्याबाबतचे पत्र व नकाशे स्मार्ट सिटीला दिले. स्मार्ट सिटी संचालक मंडळाच्या २३व्या बैठकीत दि. २४ सप्टेंबर २०२२ रोजी या विषयाला मंजुरी देण्यात आली. इतिवृत्तही मंजूर करण्यात आले. निविदा प्रक्रिया पार पडल्यानंतर संबंधित कॉन्ट्रॅक्टरला वर्कऑर्डर देण्यात आली आहे. गोविंदनगर ते उंटवाडीपर्यंत दोन्ही किनारी एकूण दहा ठिकाणी २६ सीसीटीव्ही कॅमेरे बसविण्याचे निश्चित झाले आहे. याबाबतचा स्थळ पाहणी तांत्रिक अहवाल स्मार्टसिटीला कॉन्ट्रॅक्टरने दिला आहे. या प्रकल्पाची ही माहिती देणारे सर्व पत्र स्मार्ट सिटीकडून सत्कार्य फाउंडेशनचे अध्यक्ष बाबासाहेब गायकवाड (देशमुख) यांना प्राप्त झाले आहेत.
…तर निष्क्रियतेची घंटी वाजवू
प्रभागात शिवसेना, सत्कार्य फाउंडेशनकडून विविध विकासकामे करण्यात आली. त्याचे फुकटचे श्रेय काहींनी लाटले. काही कामे मंजूर होवू नये, त्यांची वर्कऑर्डर निघू नये, मंजूर काम सुरू होवू नये, सुरू झालेले काम बंद करणे असे उद्योग श्रेय न मिळाल्याने तिळपापड झालेल्यांकडून राजकीय आकसापोटी केले जात आहेत. नंदिनीचे हे काम थांबण्यासाठी संबंधित यंत्रणेवर दबाव टाकला जाण्याची शक्यता आहे. तसे झाल्यास पर्यावरणप्रेमी व प्रभागातील नागरिकांच्या वतीने तीव्र आंदोलन छेडण्यात येईल, संबंधिताच्या निष्क्रियतेची घंटी वाजवून पर्दाफाश करण्यात येईल, असा इशाराही शिवसेना, सत्कार्य फाउंडेशनने दिला आहे.
