नाशिक – दिवाळीच्या सुटीत गावी गेलेल्या महाराष्ट्र पोलिस अकादमीच्या २२ प्रशिक्षणार्थींना कोरोनाची बाधा झाल्याचे समोर आले आहे. या सर्व बाधितांवर महापालिकेच्या बिटको रुग्णालयात उपचार करण्यात येत आहे. दिवाळीनिमित्त प्रशिक्षणार्थींना सात दिवसांची सुटी देण्यात आली होती. त्यामुळे प्रशिक्षणार्थी गावी गेले होते. सुटी संपल्याने ते अकादमीमध्ये परतले. गावाहून परतलेल्या प्रशिक्षणार्थींची महापालिकेच्या सहकार्याने कोरोना चाचणी करण्यात आली. तीन दिवसांत तीन महिला प्रशिक्षणार्थींसह २२ जणांना बाधा झाल्याचे समोर आले आहे. महाराष्ट्र पोलिस अकादमीमध्ये ८८७ प्रशिक्षणार्थींची बॅच असून या सर्वांचे लसीकरण झाले आहे. बाधितांना त्रास जाणवत नसला तरी खबरदारी म्हणून त्यांना बिटकोमध्ये दाखल करण्यात आले आहे. महाराष्ट्र राज्य सेवा परिक्षेच्या माध्यमातून पोलिस उपअधिक्षक व उपनिरीक्षक पदासाठी निवड झालेल्या राज्यभरातील उमेदवारांना महाराष्ट्र पोलिस अकादमीमध्ये प्रशिक्षण दिले जाते.
दिवाळीच्या सुटीत गावी गेलेल्या महाराष्ट्र पोलिस अकादमीत २२ प्रशिक्षणार्थींना कोरोनाची बाधा
