नाशिक : पाण्याच्या टाकीची भिंत अंगावर कोसळून चार वर्षीय मुलीचा मृत्यू झाल्याची घटना सकाळी ११ वाजता पाथर्डी फाटा परिसरातील अमृता नगर भागात घडली. आरसी अकत्तर हे मृत्यू झालेल्या मुलीचे नाव आहे. आरसी व तिचा दोन वर्षाचा लहान भाऊ तिच्या आईसोबत पाण्याच्या टाकी जवळ असतांना अचानक ही घटना घडली. पाण्याच्या टाकीची भिंत अंगावर कोसळल्याने तिचा दोन वर्षाचा भाऊ व ती भिंतीखाली दाबले गेले. यावेळी लहान भावाला काढण्यात यश आले पण, आरसीचा जागीच मृत्यू झाला. अकत्तर यांचे मूळ गाव हे बिहार असून ते नाशिक येथे नोकरीनिमित्त वास्तव्यास होते. आरसीचे वडील हे एका प्रायव्हेट लिमिटेड कंपनीत काम करतात. या घटनेमुळे परिसरात हळहळ व्यक्त करण्यात येत आहे. याप्रकरणी इंदिरानगर पोलीस ठाण्यात आकस्मित मृत्यूची नोंद करण्यात आली आहे .