नाशिक (इंडिया दर्पण वृत्तसेवा)- चक्कर येवून पडलेल्या भिका-यावरून अज्ञात वाहनाचे चाक गेल्याने सदर इसमाचा मृत्यू झाला. हा अपघात उपनगर बसस्टॉप जवळील दर्गाच्या सिग्नलवर झाला. याप्रकरणी उपनगर पोलीस ठाण्यात मृत्यूची नोंद करण्यात आली आहे.
पोलीसांनी दिलेल्या माहितीनुसार लक्ष्या बाबा असे मृत व्यक्तीचे नाव आहे. सदर व्यक्ती नाशिक पुणे मार्गावरील उपनगर बसस्टॉप जवळील दर्गा सिग्नलवर भिक मागून आपला उदर्निवाह करीत असे. रविवारी (दि.१६) नेहमी प्रमाणे ते सिग्नलवर भिक मागत असतांना ही घटना घडली.
अकराच्या सुमारास अचानक चक्कर आल्याने ते जमिनीवर कोसळले होते. याच वेळी सिग्नल सुटल्याने पाठीमागून येणा-या अज्ञात वाहनाचे चाक त्यांच्या अंगावरून गेल्याने या अपघातात सदर व्यक्तीचा जागीच मृत्यू झाला. याबाबत प्रत्यक्षदर्शनी परवेज पिंजारी (रा.वडाळानाका ) यांनी दिलेल्या खबरीवरून मृत्यूची नोंद करण्यात आली असून अधिक तपास हवालदार पवार करीत आहेत.
