नाशिक (इंडिया दर्पण वृत्तसेवा) – ठक्कर बाजार बसस्थानक परिसरात भरधाव एस.टी.ने धडक दिल्याने महिला जखमी झाल्याची घटना घडली. जखमी महिलेवर उपचार सुरू असून बसचालक आपल्या वाहनासह पसार झाला आहे. याप्रकरणी सरकारवाडा पोलिस ठाण्यात अपघाताची नोंद करण्यात आली आहे.
रत्ना बाळकृष्ण गांगुर्डे (४८ रा.मोदकेश्वर नगर, कामटवाडा) असे जखमी महिलेचे नाव आहे. गांगुर्डे या सोमवारी (दि.१५) दुपारच्या सुमारास ठक्कर बाजार बसस्थानकातून राजदूत हॉटेलच्या दिशेने पायी जात असतांना हा अपघात झाला. पाठीमागून भरधाव आलेल्या अज्ञात बसने त्यांना धडक दिली.
या घटनेत त्या जखमी झाल्याने परिसरातील नागरिकांनी धाव घेतली. त्यांना नजिकच्या रूग्णालयात उपचारार्थ दाखल केले. बस चालक आपल्या वाहनासह पसार झाला असून त्याचा पोलिस शोध घेत आहेत. अधिक तपास हवालदार शिंदे करीत आहेत.
