नाशिक (इंडिया दर्पण वृत्तसेवा) – गंगापूररोडवरील केटीएचएम महाविद्यालयाच्या आवारात एका तरूणास त्रिकुटाने बेदम मारहाण केल्याची घटना घडली. या घटनेत लाकडी स्टंपने मारहाण केल्याने १९ वर्षीय तरुण जखमी झाला. या घटनेत तरुणाची दुचाकीचे नुकसान करुन मोबाईल फोडण्यात आला आहे. याप्रकरणी सरकारवाडा पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार विशाल ज्ञानेश्वर खाडे (१९, रा. कारगिल चौक,दत्तनगर अंबड लिंकरोड) या युवकाने याप्रकरणी तक्रार दाखल केली आहे. खाडे गुरूवारी (दि.२४) महाविद्यालय सुटल्याने आपली दुचाकी घेण्यासाठी पार्किंगमध्ये आला असता ही घटना घडली. कार्तिक जाधव व त्याच्या दोन मित्रांनी त्यास गाठून कुठलेही कारण नसतांना खाडे यास शिवीगाळ करीत लाकडी स्टंम्पने बेदम मारहाण केली. यावेळी संतप्त त्रिकुटाने त्याच्या खिशातील मोबाईल आणि दुचाकी फोडून मोठे नुकसान केले. जखमी खाडे याच्यावर उपचार सुरू असून अधिक तपास हवालदार साबळे करीत आहेत.
पाथर्डी फाटा भागात घरफोडी
घरफोडीत चोरट्यांनी सुमारे पावणे पाच लाखाचा ऐवज लंपास केला. पाथर्डी फाटा परिसरातील वासननगर भागात ही घरफोडी झाली. या घरफोडीत रोकडसह सोन्याचांदीचे दागिणे चोरट्यांनी चोरुन नेले. याप्रकरणी इंदिरानगर पोलिस ठाण्यात गुन्हा दाखल करण्यात आला आहे. मनोजकुमार आनंदा नेरकर (रा.कमलज्योत रो हाऊस,वासननगर) यांनी याप्रकरणी तक्रार दाखल केली आहे. नेरकर कुटुंबिय रविवारी (दि.२०) बाहेरगावी गेले असता ही घटना घडली. अज्ञात चोरट्यांनी बंद घराचे कुलूप तोडून बेडरूममधील कपाटात ठेवलेली रोकड व सोन्याचांदीचे दागिणे असा सुमारे ४ लाख ४५ हजाराचा ऐवज चोरून नेला. अधिक तपास उपनिरीक्षक उघडे करीत आहेत.
Nashik City Crime Police Theft dacoity murder suicide fight beaten
