नाशिक (इंडिया दर्पण वृत्तसेवा) – साडे तीन लाख रूपये किमतीच्या चार सोन्याच्या बांगड्या ज्वेलरी शोरूममध्ये काम करणा-या नोकरानेच लंपास केल्या आहे. चेतन किशोर विसपुते असे संशयित नोकराचे नाव आहे. हा प्रकार शो रूममधील सीसीटिव्ही यंत्रणेत कैद झाल्याने उघडकीस आला असून अधिक तपास उपनिरीक्षक पाटील करीत आहेत.
याप्रकरणी संदेश लाल गोधवानी (रा.कलानगर,जेलरोड) यांनी तक्रार दाखल केली असून सरकारवाडा पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार गोधवानी कॅनडा कॉर्नर भागातील ओरा फाईन ज्वेलरी प्रा.लि. या सराफी शो रूमचे काम बघतात. बिझनेस स्क्वेअर या बिल्डींगमधील शॉप मध्ये काम करणा-या संशयित नोकराने ही चोरी केली. काऊंटरमध्ये ठेवलेल्या सुमारे ३ लाख ६२ हजार रूपये किमतीच्या सोन्याच्या चार बांगड्या भामट्याने हातोहात लंपास केल्या.
उंटवाडीत टोळक्याचा तरूणावर प्राणघातक हल्ला
उंटवाडीत जुन्या वादाची कुरापत काढून टोळक्याने तरूणावर प्राणघातक हल्ला केल्याची घटना घडली. या घटनेत प्रसाद प्रदिप बोरसे (रा.पाटीलनगर,त्रिमुर्ती चौक सिडको) हा युवक जखमी झाला आहे. प्रविण मधुकर खर्डे (रा. साई अनुशा अपार्टमेंट कॉलेजरोड), अथर्व प्रविण खर्डे (१९), सोहम सुनिल तळवे (रा.कृषीनगर, कॉलेजरोड), राकेश बाळकृष्ण वाळूंज (रा.वटाणेवाडी झोपडपट्टी, नासर्डी ब्रीज), रविंद्र एकनाथ वाचणे उर्फ दगड्या (२९ रा. वारणेवाडी, नासर्डी ब्रिज) व विजय संजय बैसाणे (२९ रा.काठेगल्ली, द्वारका) अशी तरूणावर हल्ला करणा-या संशयितांची नावे आहेत.
या घटनेत लोखंडी रॉडचा वापर करण्यात आल्याने बोरसे गंभीर जखमी झाला असून त्याच्यावर उपचार सुरू आहेत. याप्रकरणी अंबड पोलिस ठाण्यात खूनी हल्ला केल्याप्रकरणी सहा जणांविरूध्द गुन्हा दाखल करण्यात आला आहे. बोरसे बुधवारी (दि.१६) सायंकाळच्या सुमारास उंटवाडी भागात गेला असता ही घटना घडली. के.एम.लेफर्ड कॉपी शॉप भागात संशयितांनी त्यास गाठून जुन्या भांडणाची कुरापत काढली. या वेळी संतप्त संशयितानी शिवीगाळ व दमदाटी करीत त्यास बेदम मारहाण केली. या घटनेत लोखंडी रॉडने मारहाण करण्यात आल्याने तो गंभीर जखमी झाला असून त्याच्यावर उपचार सुरू आहेत. याप्रकरणी त्याची आई रेखा बोरसे यांनी दिलेल्या तक्रारीवरून जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.
Nashik City Crime Police Theft dacoity murder suicide fight beaten
youth attack Jewelry Show Room Canada Corner Bangles
