नाशिक (इंडिया दर्पण वृत्तसेवा) – वाद मिटवित असतांना संतप्त त्रिकुटाने तरूणास बेदम मारहाण केली असून या मारहाणीत कटरने वार करण्यात आल्याने हा तरुण जखमी झाला आहे. याप्रकरणी अफरोज मुनाफ शेख (२४ रा.म्हाडा बिल्डींग,वडाळागाव) या युवकाने तक्रार दाखल केली असून नाशिकरोड पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार रामचंद्र कांबळे, समिर आणि एक अनोळखी तरूण अशी तरूणावर वार करणा-या संशयितांची नावे आहेत.
शेख गेल्या शनिवारी (दि.२९) देवळाली गावातील गुलाबवाडी भागात आपल्या मित्रास भेटण्यासाठी गेला होता. दोघे मित्र मालधक्का रोड परिसरातून जात असतांना ही घटना घडली. संशयितांनी शेख याच्या मित्रास जुन्या वादातून शिवीगाळ केली. यावेळी शेख याने मध्यस्थी करीत वाद मिटविण्याचा प्रयत्न केला असता संतप्त त्रिकुटाने शेख यास मारहाण केली. या मारहाणी प्रसंगी एकाने त्याच्यावर धारदार कटरने वार केल्याने तो जखमी झाला असून त्याच्या जबाबावरून हा गुन्हा दाखल करण्यात आला आहे. अधिक तपास पोलिस नाईक देवरे करीत आहेत.
सिडकोत ४५ वर्षीय व्यक्तीची घरात गळफास लावून आत्महत्या
सिडकोतील हनुमानचौक भागात राहणाऱ्या ४५ वर्षीय व्यक्तीने घरात गळफास लावून घेत आत्महत्या केल्याची घटना घडली. शालिग्राम रामदास पाटील (रा.हनुमान मंदिराजवळ) असे मृत व्यक्तीचे नाव आहे. पाटील यांच्या आत्महत्येचे कारण समजू शकले नाही. याप्रकरणी अंबड पोलिस ठाण्यात मृत्यूची नोंद करण्यात आली आहे. पाटील यांनी मंगळवारी (दि.१) अज्ञात कारणातून आपल्या राहत्या घरातील हॉलमध्ये पंख्यास दोरी बांधून गळफास लावून घेतला होता. त्यात त्यांचा मृत्यू झाला. याबाबत विष्णू पाटील यांनी दिलेल्या खबरीवरून पोलिस दप्तरी मृत्यूची नोंद करण्यात आली असून अधिक तपास पोलिस नाईक शिरवले करीत आहेत.
nashik city crime suicide fight beaten
youth cidco police
