जेलरोडला डिलेव्हरी बॉयला लुटले तर सिडकोत लाखाची घरफोडी

जेलरोडला डिलेव्हरी बॉयला लुटले

नाशिक – घड्याळाची डिलेव्हरी देवून घराकडे परतणाऱ्या तरूणास लुटल्याप्रकरणी पोलीसांनी दोघांना अटक केली. संशयीतांचा सराईत साथीदार फरार असून ही  घटना जेलरोड भागात घडली होती. डिलेव्हरी बॉयची दुचाकी अडवीत संशयीतांनी धमकावीत डिजीटल घड्याळ बळजबरीने हिसकावून नेले होते. याप्रकरणी नाशिकरोड पोलीस ठाण्यात जबरीलुटीचा गुन्हा दाखल करण्यात आला आहे.

कार्तीक पालकर (रा.बालाजीनगर,मोरे मळा),वैभव जाधव (रा.आडगाव शिवार) अशी अटक केलेल्या संशयीतांची नावे असून साहिल उर्फ पोश राजू मांगकाली (रा.रोकडोबावाडी) हा पोलीस रेकॉर्डवरील त्यांचा साथीदार अद्याप फरार आहे. पोलीसांनी दिलेल्या माहितीनुसार शुभम विठ्ठल उगलमुगले (२२ रा.द्वारकानगर,जेलरोड) या युवकाने तक्रार दिली आहे.  उगलमुगले हा एका नामांकीत कंपनीत डिलेव्हरी बॉयचे काम करतो. शनिवारी (दि.१०) रात्री तो केकची आॅर्डर देवून आपल्या घराकडे जात असतांना ही घटना घडली. दुचाकीने जेलरोड भागातून तो प्रवास करीत असतांना आठवण हॉटेल समोर पल्सरवर आलेल्या संशयीत त्रिकुटाने त्यास अडविले. कोयत्याचा धाक दाखवून व धमकावीत त्याची बॅग तपासण्यात आली. यावेळी संतप्त त्रिकुटाने हाती काही लागले नाही म्हणून बँग फाडून काढत उगलमुगले याच्या हातातील सुमारे सााडे तीन हजार रूपये किमतीचे स्मार्ट वॉच बळजबरीने काढून घेत पोबारा केला होता. अधिक तपास सहाय्यक निरीक्षक शेळके करीत आहेत.

—

सिडकोतील उत्तमनगरमध्ये लाखाची घरफोडी

नाशिक – सिडकोतील उत्तमनगर भागात झालेल्या घरफोडीत चोरट्यांनी एक लाखाच्या मुद्देमालावर डल्ला मारला. त्यात रोकडसह सोन्याचांदीच्या दागिण्यांचा समावेश आहे. याप्रकरणी अंबड पोलीस ठाण्यात घरफोडीचा गुन्हा दाखल करण्यात आला आहे.

मिनल शैलेश सोनवणे यांनी याप्रकरणी तक्रार दाखल केली आहे. पोलीसांनी दिलेल्या माहितीनुसार सोनवणे कुटूंबिय शनिवारी (दि.१०) बाहेरगावी गेले असता ही घटना घडली. अज्ञात चोरट्यांनी त्यांच्या बंद घराच्या मुख्य दरवाजाचे कुलूप तोडून लोखंडी कपाटातील दहा हजाराची रोकड व सोन्याचांदीचे दागिणे असा सुमारे ९० हजार ६०० रूपयांचा ऐवज चोरून नेला. अधिक तपास अंमलदार कैलास सोनवणे करीत आहेत.

—

बेळगाव ढगा येथील दारू विक्रेते जेरबंद

नाशिक – शहरानजीकच्या बेळगाव ढगा शिवारात बेकायदा दारू विक्री करणाºया दोघांना पोलीसांनी बेड्या ठोकल्या. संशयीतांच्या ताब्यातून देशी दारूचा साठा हस्तगत करण्यात आला असून याप्रकरणी सातपूर पोलीस ठाण्यात गुन्हा दाखल करण्यात आला आहे.

गंगाराम सोमनाथ व्हलारे (५० रा.डांबरवाडी,बेळगाव ढगा) आणि संदिप शांकर मांडे (४१ रा. मातोश्रीनगर, बेळगाव ढगा) अशी अटक करण्यात आलेल्या दारू विक्रेत्यांची नावे आहेत. बेळगाव ढगा येथे बेकायदा मद्याची विक्री होत असल्याची माहिती सातपूर पोलीसांना मिळाली होती. त्यानुसार रविवारी (दि.११) पोलीस यंत्रणा कामाला लागली होती. संशयीत व्हलारे हा डांबरवाडी येथील चिंचेच्या झाडाखाली तर मांडे हा राजवाड्यातील एका गोठ्याजवळ दारू विक्री करतांना मिळून आला. व्हलारे याच्या ताब्यातून १५ तर मांडे यांच्या ताब्यात १० बाटल्या असा सुमारे बाराशे रूपये किमतीच्या प्रिन्स संत्रा नावाच्या देशी दारूचा साठा मिळून आला. याप्रकरणी पोलीस कर्मचारी विजयकुमार जीरे यांनी दिलेल्या तक्रारीवरून वेगवेगळे गुन्हे दाखल करण्यात आले असून अधिक तपास जमादार गिते करीत आहेत.

—

बांधकामावरून पडल्याने कामगाराचा मृत्यु

नाशिक : नव्याने सुरू असलेल्या बांधकाम साईटच्या पहिल्यामजल्यावरून पडल्याने कामगाराचा मृत्यु झाल्याची घटना इंदिरानगर पोलीस ठाणे हद्दीत घडली. याप्रकरणी पोलीस दप्तरी नोंद करण्यात आली आहे.

संतोष आनंदा डगळे (४० रा.निखीलपार्क,सिडको) असे इमारतीवरून पडल्याने ठार झालेल्या कामगाराचे नाव आहे. पोलीसांनी दिलेल्या माहितीनुसार डगळे परिसरातील किरण तुकाराम ढगे यांच्या घराच्या बांधकामावर काम करीत असतांना ही घटना घडली. रविवारी (दि.११) दुपारच्या सुमारास डगळे बांधकामाच्या पहिल्या मजल्यावर काम करीत असतांना अचानक तोल जावून जमिनीवर कोसळला होता. या घटनेत गंभीर जखमी झाल्याने त्यास तातडीने आडगाव येथील मेडिकल कॉलेजमध्ये दाखल केले असता वैद्यकीय सुत्रांनी त्यास मृत घोषीत केले. अधिक तपास हवालदार पथवे करीत आहेत.