नाशिक (इंडिया दर्पण वृत्तसेवा) – महामार्गावरील जैन मंदिर भागात भरधाव अज्ञात वाहनाने दिलेल्या धडकेत दुचाकीस्वार ठार झाला. संतोष नारायण भार्दुल (४० रा. भगवतीनगर हिरावाडी) असे मृत दुचाकीस्वाराचे नाव आहे. याप्रकरणी आडगाव पोलिस ठाण्यात मृत्यूची नोंद करण्यात आली आहे. पोलिसांनी दिलेल्या माहितीनुसार भार्दुल शुक्रवारी (दि.१७) रात्री नाशिककडून ओझरच्या दिशेने आपल्या दुचाकीवर प्रवास करीत असतांना हा अपघात झाला. महामार्गाने ते प्रवास करीत असतांना आडगाव शिवारातील जैन मंदिरासमोर पाठीमागून भरधाव आलेल्या अज्ञात वाहनाने दुचाकीस धडक दिल्याने ते गंभीर जखमी झाले होते. स्थानिकांनी त्यांना तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले. याबाबत पोलिस शिपाई अमित पवार यांनी दिलेल्या खबरीवरून मृत्यूची नोंद करण्यात आली असून अधिक तपास हवालदार बस्ते करीत आहेत.
