तिडके कॉलनी भागात भरदिवसा घरफोडी; सव्वा पाच लाख रूपयांचा ऐवज चोरीला
नाशिक : तिडके कॉलनी भागात भरदिवसा घरफोडून सव्वा पाच लाख रूपयांचा ऐवज चोरून नेल्याची घटना घडली. त्यात २५ हजाराच्या रोकडसह सोन्याचांदीच्या वस्तूंचा समावेश आहे. याप्रकरणी मुंबईनाका पोलिस ठाण्यात घरफोडीचा गुन्हा दाखल करण्यात आला आहे. कविता दिपक चंद्रात्रे (रा.गोपाळ अपा.निलेश सुपर मार्केट मागे) यांनी तक्रार दाखल केली आहे. चंद्रात्रे या गुरूवारी (दि.१४) सायंकाळच्या सुमारास आजारी वडिलांना घेवून टिळकवाडी भागातील खासगी रूग्णालयात गेल्या असता ही घटना घडली. अज्ञात चोरट्यांनी बंद घराचा कडीकोयंडा तोडून बेडरूममधील कपाटात ठेवलेले २५ हजार रूपयांची रोकड आणि सोन्याचांदीचे दागिणे असा सुमारे ५ लाख २१ हजाराचा ऐवज चोरून नेला. अधिक तपास उपनिरीक्षक डी.व्ही.शेळके करीत आहेत.
बागवानपुरात रोकडसह दागिणे चोरीस
नाशिक : बागवानपुरा परिसरात घरात शिरून चोरट्यांनी रोकडसह दागिणे चोरून नेल्याची घटना घडली. याप्रकरणी भद्रकाली पोलिस ठाण्यात चोरीचा गुन्हा दाखल करण्यात आला आहे. रूक्साना अजगर पठाण (रा.हरिनगरी,बागवानपुरा) यांनी याप्रकरणी तक्रार दाखल केली आहे. पठाण या शुक्रवारी (दि.१५) दुपारच्या सुमारास अल्पावधीच्या कामासाठी घराबाहेर पडल्या असता ही घटना घडली. दरवाजा उघडा ठेवून त्या शेजारी गेल्या असता अज्ञात चोरट्यांनी त्यांच्या घरात प्रवेश करून बेडच्या बाजूला टांगलेली मिनी पर्स चोरून नेली. पर्समध्ये सोन्याची सोन्याचांदीचे दागिणे, तीन हजाराची रोकड व दोन मोबाईल असा सुमारे ३३ हजाराचा ऐवज होता. अधिक तपास उपनिरीक्षक डी.वाय.पवार करीत आहेत.
